სიახლეები

ნინოწმინდის პანსიონში მიმდინარე მოვლენების გაშუქებისას მედიასაშუალებებში ვრცელდება ბავშვთა სახლის არასრულწლოვანი ბენეფიციარების ვიდეოჩანაწერები, სადაც მათი იდენტიფიცირება არის შესაძლებელი. გავრცელებულ ვიდეოში ისმის ბავშვებისა და ერთ-ერთი მშობლის სახელი-გვარი, ასევე, მისი ტელეფონის ნომერი.

ჟურნალისტური ეთიკის ქარტია მოუწოდებს მედიასაშუალებებს განსაკუთრებული სიფრთხილით გააშუქონ ნინოწმინდის პანსიონში მიმდინარე მოვლენები. მედიას აკისრია უდიდესი პასუხისმგებლობა, და­იცვას ბავშვის ინტერესები და ხელი არ შეუწყოს მათი უფლებების დარღვევას. მოვუწოდებთ ჟურნალისტებს თავი შეიკავონ ამ ჩანაწერების ისეთი ფორმით გავრცელებისა და გასაჯაროვებისგან, სადაც იდენტიფიცირებული იქნება ბავშვების და მათი მშობლების  პერსონალური ინფორმაცია. 

ჟურნალისტური ეთიკის ქარტიის საბჭო ჟურნალისტებს რამდენიმე რეკომენდაციით მიმართავს:

  • უპირატესი მნიშვნელობა მიანიჭეთ ბავშვის ინტერესებს, არ მოამზადოთ ისეთი მასალა, რომელიც საზიანო იქნება მისთვის;
  • წინასწარ შეაფასეთ ის ნეგატიური შედეგები, რაც შეიძლება ბავშვის იდენტიფიცირებას მოჰყვეს;
  • ეცადეთ თავიდან აიცილოთ ბავშვის რეტრავმირება და არ გაახსენოთ ის ამბავი, რაც მასზე ნეგატიურად იმოქმედებს. 
04.06.2021

საქართველოს ჟურნალისტური ეთიკის ქარტიის საბჭოს გადაწყვეტილებით, ონლაინ მედიასაშუალება KutaisiToday.ge-ს რედაქტორმა ბუბა ჩივაძემ ქარტიის პირველი (ინფორმაციის სიზუსტე), მეხუთე (შესწორება) და მეათე (პირად ცხოვრებაში შეჭრა) პრინციპი დაარღვია.

მის წინააღმდეგ ქარტიას მოქალაქე შოთა შალამბერიძემ მომართა. სადავო იყო აღნიშნული მედიასაშუალების მიერ Facebook გვერდზე გაზიარებული კერძო პირის Facebook სტატუსი. 

ქარტიის საბჭო ჟურნალისტურ პროდუქტად არ მიიჩნევს ინფორმაციას, რომელიც გავრცელდა როგორც პერსონალური მოსაზრება, ან გამოქვეყნდა პირადი ანგარიშით. მაგალითად, თუ ჟურნალისტი თავისი პირად Facebook გვერდზე ავრცელებს ინფორმაციას, ეს არ ითვლება ჟურნალისტურ პროდუქტად, მაგრამ, თუ იმავე სოციალურ ქსელში ინფორმაცია ვრცელდება/ზიარდება საინფორმაციო საშუალების სახელით, ეს შეიძლება იყოს ქარტიის საბჭოს განხილვის საგანი. მედია სწორედ იმით გამოირჩევა, რომ იგი პოზიციონირებს, როგორც ინფორმაციის გამავრცელებელი საშუალება, ასეთად აღიქმება საზოგადოების მიერ და არსებობს მოლოდინი, რომ იგი პატივს სცემს საზოგადოების უფლებას, მიიღოს ზუსტი და გადამოწმებული ინფორმაცია. 

განმცხადებლის განმარტებით, გავრცელებული ინფორმაცია მამამისის თანამდებობის და თითქოს, მის მიერ ჩატარებული ღონისძიების შესახებ, სიმართლეს არ შეესაბამებოდა და მიზნად ისახავდა მისი ოჯახის დისკრედიტაციას.

გადაწყვეტილების სამოტივაციო ნაწილი მოგვიანებით გამოქვეყნდება.

04.06.2021
საქართველოს ჟურნალისტური ეთიკის ქარტიის სამდივნომ დასაშვებად ცნო ჯაბა ფუტკარაძის განცხადება TV პირველის, გადაცემა “ნოდარ მელაძის შაბათის” წამყვანის ნოდარ მელაძის და ჟურნალისტ ნატა ქაჯაიას წინააღმდეგ.

სადავო გადაცემა, ტელეკომპანიის ეთერში 2021 წლის 08 მაისს გავიდა და სახელმწიფოს საკუთრებაში არსებული მიწის გასხვისების საკითხს ეხებოდა.

განმცხადებლების პოზიციით, გადაცემაში გაჟღერებული ბრალდება აჭარის ავტონომიური რესპუბლიკის ფინანსთა და ეკონომიკის მინისტრის - ჯაბა ფუტკარაძის მისამართით, თითქოს მან სახელწიფოს საკუთრებაში არსებული ქონება უცხოელებზე ქრთამის აღების მიზნით გაასხვისა, სიმართლეს არ შეესაბამება. მიზნად ისახავს მინისტრის დისკრედიტაციას და ზიანს აყენებს მის რეპუტაციას.

განმცხადებელი დავობს ინფორმაციის სიზუსტის (პირველი) და შესწორების (მეხუთე) პრინციპების დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.
03.06.2021

საქართველოს ჟურნალისტური ეთიკის ქარტიის საბჭო 3 ივნისს 4 საქმეს ონლაინ განიხილავს:

1. 18:00 საათზე - შოთა შალამბერიძე ბუბა ჩივაძის წინააღმდეგ 

განცხადების თანახმად, KutaisiToday.ge-ის მიერ სოციალურ ქსელში გაზიარებული ინფორმაცია სიმართლეს არ შეესაბამება. შოთა შალამბერიძე ამბობს, რომ მედიასაშუალების მიერ გაზიარებული მასალა მისი ოჯახის დისკრედიტაციას ემსახურება. 

მხარე თვლის, რომ დარღვეულია ქარტიის პირველი (ინფორმაციის სიზუსტე), მესამე (წყაროს დადასტურება), მეხუთე (შესწორება), მეათე (პირადი ცხოვრების ხელშეუხებლობა) და მეთერთმეტე (ფაქტის განზრახ დამახინჯება) პრინციპები.

2. 19:30 საათზე - გიორგი კვაშილავა ნინი ჟიჟიაშვილის და მიხეილ სესიაშვილის წინააღმდეგ

სადავო სიუჟეტი ტელეკომპანია "მთავარი არხის" გადაცემაში "მთავარი შაბათი" გავიდა. განმცხადებელი თვლის, რომ ჟურნალისტმა მასთან სატელეფონო საუბრისას ჩაწერილი კომენტარი დამახინჯებულად გამოიყენა და საზოგადოებას არ მიაწოდა სწორი ინფორმაცია.

მხარე თვლის, რომ დარღვეულია ქარტიის პირველი (ინფორმაციის სიზუსტე), მესამე (წყაროს დადასტურება), მეოთხე (ინფორმაციის არაკეთილსინდისიერი მოპოვება), მეხუთე (შესწორება) და მეთერთმეტე (ფაქტის განზრახ დამახინჯება) პრინციპები.

3. 20:30 საათზე - ანა აფციაური ნუცა მამულაშვილის წინააღმდეგ

განცხადების თანახმად, ტელეკომპანია „იმედის" გადაცემაში „იმედის დღე" გასულ სიუჟეტში ჟურნალისტი საკუთარი შეფასებებითა და რესპონდენტების კომენტარებით ამყარებს სექსუალური შევიწროების, სექსუალური ძალადობის და ქალთა მიმართ ძალადობის შესახებ საზოგადოებაში არსებულ სტერეოტიპებს, აჟღერებს მცდარ ინფორმაციას.

მხარე თვლის, რომ დარღვეულია ქარტიის მეშვიდე (დისკრიმინაცია) და მეათე (პირადი ცხოვრების ხელშეუხებლობა) პრინციპები. 

4. 21:00 საათი - თამაზ სოზაშვილი გიორგი გასვიანის წინააღმდეგ

განმცხადებელი მიიჩნევს, რომ ტელეკომპანია “იმედის” ეთერში, გადაცემა „სიცრუის დეტექტორში“ გადაცემის წამყვანმა სტუმარს მისცა საშუალება მოეხდინა ლგბტქ ადამიანების და მათი უფლებადამცველების, არასამთავრობო ორგანიზაციების დისკრედიტაცია. 

მხარე თვლის, რომ დარღვეულია ქარტიის მეშვიდე (დისკრიმინაცია) პრინციპი. 

სხდომა გაიმართება ონლაინ, პროგრამა Zoom-ის მეშვეობით. სხდომაზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება.



03.06.2021
საქართველოს ჟურნალისტური ეთიკის ქარტიის სამდივნომ დასაშვებად ცნო გამომძიებელ ჟურნალისტთა გაერთიანება “აი ფაქტის” განცხადება TV პირველის ჟურნალისტის სოფო ნიაურის წინააღმდეგ.

სადავო გადაცემა, ტელეკომპანიის საინფორმაციო გამოშვებაში, 2021 წლის 23 მაისს გავიდა და ის კასპში გზის რეაბილიტაციას და კომპანია “ჰაიდელბერგ ცემენტ ჯორჯიას” ეხებოდა.

განმცხადებლების პოზიციით, სიუჟეტში, ზემოაღნიშნულ კომპანიასთან დაკავშირებით გავრცელებული ინფორმაცია არაზუსტია, . გარდა ამისა, მხარის თქმით, TV პირველის ჟურნალისტმა თავის მასალაში გამოიყენა “აი ფაქტის” ვებგვერდზე გამოქვეყნებული სტატია ისე, რომ მასალის პირველწყაროს შესახებ არ მიუთითებია.

განმცხადებელი დავობს ინფორმაციის სიზუსტის (პირველი) და პლაგიატის (მეთერთმეტე, ნაწილი მესამე) პრინციპების დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.
03.06.2021
საქართველოს ჟურნალისტური ეთიკის ქარტიის საბჭოს გადაწყვეტილებით, აჭარის საზოგადოებრივ მაუწყებელზე გამოქვეყნებულ მასალაში ინფორმაციის სიზუსტის (პირველი) და შესწორების (მეხუთე) პრინციპები დაირღვა.

ქარტიას პაატა დიასამიძემ მომართა. სადავო ჟურნალისტური პროდუქტი “ბათუმის სასამართლომ ირაკლი ჯინჭარაძის სარჩელი არ დააკმაყოფილა” ტელეკომპანიის ვებგვერდზე, 2021 წლის 18 მაისს გამოქვეყნდა.

განმცხადებელი განმარტავდა, რომ მასალის სათაური, რომ თითქოს ირაკლი ჯინჭარაძის სარჩელი სასამართლომ არ დააკმაყოფილა, სიმართლეს არ შეესაბამებოდა.

გადაწყვეტილების სამოტივაციო ნაწილი მოგვიანებით გამოქვეყნდება.
01.06.2021
საქართველოს ჟურნალისტური ეთიკის ქარტიის საბჭოს გადაწყვეტილებით, TV პირველის ჟურნალისტებმა ნატა ქაჯაიამ და რუსუდან ჯაბანიშვილმა ინფორმაციის სიზუსტის (პირველი) და შესწორების (მეხუთე) პრინციპი დაარღვიეს.

მათ წინააღმდეგ ქარტიას ცენტრალურმა საარჩევნო კომისიამ მომართა. სადავო ჟურნალისტური პროდუქტი ტელეკომპანიის ეთერში, საინფორმაციო გამოშვებაში, 2021 წლის 10 თებერვალს გავიდა და საოლქო საარჩევნო კომისიის წევრების არჩევას ეხებოდა.

განმცხადებელი განმარტავდა, რომ სიუჟეტში გადმოცემული ინფორმაცია საარჩევნო ადმინისტრაციის წარმომადგენლების საქმიანობის შესახებ, ასევე, ამ პროცესის დაკავშირება ხელისუფლებასა და ოპოზიციას შორის საარჩევნო ადმინისტრაციის რეფორმირებაზე მიმდინარე მოლაპარაკებებთან, სიმართლეს არ შეესაბამებოდა და აზიანებდა საარჩევნო პროცესს.

გადაწყვეტილების სამოტივაციო ნაწილი მოგვიანებით გამოქვეყნდება.
01.06.2021
2021 წლის 27 მაისს გავრცელებული ინფორმაციით, ხულოს საკრებულოს „ქართული ოცნების“ წევრმა ნუგზარ სოლომონიძემ „Factcheck.ge"-ს ანალიტიკოსს ნაზი რეხვიაშვილს მუქარის შემცველ შეტყობინებები გაუგზავნა.

კოალიცია "მედიის ადვოკატირებისთვის" მოუწოდებს საქართველოს შინაგან საქმეთა სამინისტროს დაუყოვნებლივ გამოიძიოს მომხდარი ფაქტი.

კოალიციის წევრი ორგანიზაციები კიდევ ერთხელ მიმართავენ კოალიცია "ქართულ ოცნების" ლიდერებს მიიღონ სათანადო ზომები ხელისუფლების წარმომადგენლების მიერ ჟურნალისტებზე სისტემატური თავდასხმების შესაჩერებლად.

28.05.2021

გავრცელებული ინფორმაციით, ხულოს საკრებულოს „ქართული ოცნების“ წევრი ნუგზარ სოლომონიძე „Factcheck.ge"-ს ანალიტიკოსს ნაზი რეხვიაშვილს მუქარის შემცველ შეტყობინებებს უგზავნის. „რომ მოვა დრო, მერე მიხვდები რა საფრთხეში გაბი შენი მომავალი, ვერ გიცნივარ,“ „საომრად მეორედ გამოიწვიე მელოდე“ - წერს ნუგზარ სოლომონიძე ჟურნალისტს მას შემდეგ, რაც ნაზი რეხვიაშვილმა საკუთარ ფეისბუქგვერდზე ტვ 25-ის მასალიდან ამონარიდი გამოაქვეყნა, სადაც საკრებულოს წევრი აჭარის მთავრობის თავმჯდომარეს, თორნიკე რიჟვაძეს „აჭარის უმაღლესი საბჭოს თავმჯდომარედ“ მოიხსენიებს. 

ჟურნალისტური ეთიკის ქარტია მოუწოდებს სამართალდამცავ ორგანოებს მყისიერად გამოიძიონ მომხდარი ფაქტი, ხელისუფლების წარმომადგენელს კანონის შესაბამისად მოსთხოვონ პასუხი და დაუყოვნებლივ მიიღონ პრევენციული ღონისძიებები ჟურნალისტის უსაფრთხოების უზრუნველსაყოფად.

ქარტიას მიაჩნია, რომ განსაკუთრებით საყურადღებოა თანამდებობის პირის მხრიდან მედიის წარმომადგენლის მიმართ მუქარის ფაქტი. 

ჟურნალისტური ეთიკის ქარტია ყოველთვის დაიცავს ჟურნალისტთა უფლებებს და გამოხატვის თავისუფლების მაღალ სტანდარტს და მიაჩნია, რომ მის წინააღმდეგ გაკეთებული ყველა განცხადება საფრთხეს უქმნის ქართული სახელმწიფოს დემოკრატიულ განვითარებას.

27.05.2021

ბელარუსის ხელისუფლებამ ცრუ შეტყობინების საფუძველზე მინსკში ავარიულად დასვა თვითმფრინავი და დააკავა მასში მყოფი ჟურნალისტი და ბლოგერი რომან პროტასევიჩი, რომელსაც ხელისუფლება არეულობის მოწყობაში ადანაშაულებს.


  • საქართველოს ჟურნალისტური ეთიკის ქარტია სოლიდარობას უცხადებს რომან პროტასევიჩს  და მიაჩნია, რომ იგი დაუყოვნებლივ უნდა გათავისუფლდეს. 
  • ქარტია მოუწოდებს საქართველოს ხელისუფლებას, ჰქონდეს სათანადო რეაქცია მედიის წარმომადგენლის დაკავებასთან დაკავშირებით. აღსანიშნავია, რომ საგარეო საქმეთა სამინისტრო შემთხვევას მხოლოდ Twitter-ზე  გამოეხმაურა, სადაც მიესალმა რეისის უსაფრთხო დაშვებასა და ბორტზე მყოფი ადამიანის დაკავება მიუღებლად შეაფასა. ქარტია მიიჩნევს, რომ საგარეო საქმეთა სამინისტროს განცხადება არანაირად არ ასახავს შექმნილი ვითარების სიმწვავეს. ლიეტუვამ და ევროკავშირის სხვა ქვეყნებმა უკვე მოითხოვეს ბელარუსის რეჟიმის წინააღმდეგ ახალი სანქციები, მნიშვნელოვანია, საქართველოს ხელისუფლებასაც ჰქონდეს სათანადო რეაქცია და დაგმოს ჟურნალისტის დაკავება.
  • საქართველოს ჟურნალისტური ეთიკის ქარტია მიმართავს საერთაშორისო ორგანიზაციების წარმომადგენლებსა და საერთაშორისო ჟურნალისტურ გაერთიანებებს, რომ გამოიყენონ მათ ხელთ არსებული ყველა საშუალება, რათა ერთად დავიცვათ სიტყვისა და გამოხატვის თავისუფლება. 
24.05.2021
საქართველოს ჟურნალისტური ეთიკის ქარტიის სამდივნომ დასაშვებად ცნო აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტროს და ქეთევან ბაკარაძის განცხადება TV პირველის ჟურნალისტების ეკო მაღრაძის, ვასილ დაბრუნდაშვილის და ინა ცარციძის წინააღმდეგ.

ორივე განმცხადებელმა ქარტიას იდენტურ მასალაზე მომართა. სადავო გადაცემა, ,,პირველების ცენტრალური გამოშვება ეკო მაღრაძესთან და ვასილ დაბრუნდაშვილთან ერთად“, ტელეკომპანიის ეთერში, 2021 წლის 21 აპრილს გავიდა.

განმცხადებლების პოზიციით, გადაცემაში მტკიცებით ფორმაში გაჟღერებული ბრალდებები თითქოს აფხაზეთის ავტონომიური რესპუბლიკის ჯანმრთელობისა და სოციალური დაცვის სამინისტრომ ფული მიითვისა, რის გამოც მაღალი თანამდებობის პირების მიმართ დაწყებულია გამოძიება, სიმართლეს არ შეესაბამება.

განმცხადებელი დავობს ქარტიის შემდეგი პრინციპების დარღვევაზე:
  • პირველი - ინფორმაციის სიზუსტე
  • მესამე - დადასტურებული წყარო
  • მეხუთე - შესწორება
  • მეთერთმეტე - ფაქტის განზრახ დამახინჯება
ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.
19.05.2021
საქართველოს ჟურნალისტური ეთიკის ქარტიის სამდივნომ დასაშვებად ცნო გიგა კოტრიკაძის განცხადება POSTV-ს წინააღმდეგ.

სადავო გადაცემა ტელეკომპანიის ეთერში, 2021 წლის 13 აპრილს გავიდა და ის ნამახვანჰესის საწინააღმდეგო აქციას ეხებოდა.

განმცხადებლის პოზიციით, სიუჟეტში არასწორად და შეცდომით ხდება მისი იდენტიფიცირება. მისი განმარტებით, როგორც თვითონ, ასევე აქციის სხვა მონაწილეებიც წარმოჩენილია, როგორც დესტრუქციულ და პოლიტიკურად ანგაჟირებულ ჯგუფად. განმცხადებლის თქმით, ეს ინფორმაცია სიმართლეს არ შეესაბამება, ემსახურება საზოგადოების შეცდომაში შეყვანას და ზიანს აყენებს საპროტესტო პროცესს.

განმცხადებელი დავობს ქარტიის შემდეგი პრინციპიების დარღვევაზე:
  • პირველი - ინფორმაციის სიზუსტე
  • მესამე - დადასტურებული წყარო
  • მეხუთე - შესწორება
  • მეშვიდე - დისკრიმინაცია
  • მეთერთმეტე - ფაქტის განზრახ დამახინჯება
ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.
18.05.2021

შემოგვიერთდით Facebook-ზე

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.

ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.