შსს ჟურნალისტების დასაშინებლად და დასასჯელად ახალ პრაქტიკას ამკვიდრებს - მათ ყოველგვარი წინასწარი შეტყობინების გარეშე უყადაღებენ საბანკო ანგარიშებს ჯარიმების გამო, რომელიც თვეების წინ გამოუწერეს „გზის ხელოვნურად გადაკეტვის“ საბაბით, და რომლის შესახებაც ჟურნალისტებმა არაფერი იცოდნენ. შსს იმედოვნებს, რომ ფინანსური წნეხის მეშვეობით და ყოფითი პრობლემების შექმნით ჟურნალისტებს პროტესტის გაშუქებაზე ხელს ააღებინებს.  

„ტვ პირველის“ გამომძიებელმა ჟურნალისტმა მაკა ჩიხლაძემ დღეს, 2026 წლის 15 აპრილს, საბანკო ანგარიშების დაყადაღების შემდეგ შეიტყო 5,000-ლარიანი ჯარიმის შესახებ, რომელიც მას შსს-მ ამ საბაბით 2025 წლის 15 ოქტომბერს დააკისრა. 

მაკა ჩიხლაძე ამბობს, რომ კარგად ახსოვს ის დღე - 15 ოქტომბერი, და რეპორტაჟიც, რომელზეც მაშინ მუშაობდა. ის 4 ოქტომბრის მოვლენებთან დაკავშირებით მამხილებელ სიუჟეტს იღებდა და უკვე გადაკეტილ რუსთაველის გამზირზე რესპონდენტებს წერდა. ჟურნალისტი ყადაღას მიიჩნევს შურისძიებად მისი პროფესიული საქმიანობის და ამ კონკრეტული სიუჟეტის გამო. თუ მაკა ჩიხლაძე ჯარიმის შესახებ დროულად შეიტყობდა, ის მალევე შეძლებდა შესაბამისი უწყებებისთვის იმის დამტკიცებას, რომ 15 ოქტომბერს რუსთაველის გამზირზე პროფესიულ მოვალეობას ასრულებდა.

მაკა ჩიხლაძე უკვე მეორე ჟურნალისტია, ვის საბანკო ანგარიშებსაც შსს-ს ჯარიმის გამო ბოლო 10 დღის განმავლობაში ყადაღა დაედო. 

7 აპრილს ანგარიშები დაუყადაღეს ტელეკომპანია „ფორმულას“ ჟურნალისტს ლიზა ციციშვილს 2025 წლის 10 სექტემბერს „გზის ხელოვნურად გადაკეტვის“ გამო. 2025 წლის 5 ნოემბერს ლიზა ციციშვილი რუსთაველის გამზირზე პროფესიული მოვალეობის შესრულებისას მცირე ხნით დააკავეს. არც დაკავებისას, არც მერე, ჟურნალისტისთვის ჯარიმის შესახებ ინფორმაცია შსს-ს არ მიუწოდებია. 

ცალკე საკითხია თავად ჯარიმების კანონიერება და პროპორციულობა. 

მართალია, ცალკეულ შემთხვევებში ჟურნალისტების მიმართ „გზის ხელოვნულად გადაკეტვის“ საბაბით წარმოებული საქმეები შეწყდა, პოზიტიური გამოსავლის შემთხვევაშიც კი, შსს-ს მსგავსი ქმებებები ჟურნალისტებისთვის დიდ ტვირთს წარმოადგენს და აკარგვინებს მათ დროს გასაჩივრებასა და სასამართლო დარბაზებში სიმართლის მტკიცებაზე. ძნელი დასაჯერებელია, რომ შსს-მ ვერ შეძლო მაღალი ცნობადობის მქონე ტელეჟურნალისტების იდენტიფიცირება. ფაქტი ისაა, რომ შსს-მს მათ დევნაში გაფლანგა საჯარო რესურსი, რაც საზოგადოებისთვის და, მათ შორის ჟურნალისტებისთვის, უსაფრთხო გარემოს შექმნისთვის უნდა მოეხმარებინა. 

შსს-მ დღემდე ვერ შეძლო გამოევლინა და დაესაჯა ის პირები, რომლებიც მაკა ჩიხლაძეს 2024 წლის 7 დეკემბერს დაესხნენ თავს იმ დროს, როცა ის გრიბოედოვის ქუჩიდან პირდაპირ ეთერში მუშაობდა. ამისთვის შსს-ს პოლიტიკური ნება არ ჰყოფნის. გაცილებით ადვილია ჟურნალისტების დევნა, რომლებიც კანონის სრული დაცვით ახორციელებენ პროფესიულ საქმიანობას. 

ქარტია სოლიდარობას უცხადებს მაკა ჩიხლაძეს, ლიზა ციციშვილს და ყველა ჟურნალისტს, რომელიც შსს-ს მხრიდან უსამართლო და დაუსაბუთებელ დევნას დაექვემდებარა, და მადლობას უხდის მათ პროფესიის ერთგულებისთვის. 

ქარტია შსს-ს მოუწოდებს, შეწყვიტოს ჟურნალისტების შევიწროება გამოგონილი ბრალდებებით და მეტი გულმოდგინებითა და გაბედულებით ებრძოლოს კრიმინალსა და საზოგადოებისათვის საფრთხის შემცველ პირებსა და გარემოებებს.  

18 აპრილს, შაბათს, 11:00 საათზე, ქარტიის საბჭო განიხილავს მოსამართლე ვლადიმერ ხუჭუას განცხადებას ტელეკომპანია “იმედის” ჟურნალისტების წინააღმდეგ.

სადავო მედია პროდუქტი ტელეკომპანია “იმედის” ეთერში გადაცემა “ქრონიკაში” 2026 წლის 16 თებერვალს, 20:00 საათზე გავიდა. განმცხადებელი მიიჩნევს, რომ “იმედის” ჟურნალისტებმა მის მიმართ არაერთი არაზუსტი ინფორმაცია გავრცელეს.

განმცხადებელი დავობს ქარტიის პირველი (სიზუსტე) და მე-5 (შესწორება) პრინციპების დარღვევაზე.

მოპასუხე ჟურნალისტებად განმცხადებლის მხრიდან განისაზღვრნენ ხატია ქვათაძე, ლევან ჯავახიშვილი და მარიამ ქართველიშვილი. 

ქარტიის საბჭო განცხადებას განიხილავს და გადაწყვეტს, დაირღვა თუ არა სადავო ჟურნალისტურ პროდუქტში ქარტიის პრინციპები.

ტელეკომპანია „ფორმულას“ ცნობით, უკვე რამდენიმე დღეა, ჟურნალისტ დავით ჭაბაშვილს სიცოცხლის მოსპობით ემუქრება მისთვის უცნობი პირი, სავარაუდოდ, გია კიკოლაშვილი-ჭანტურია. ჟურნალისტს მესენჯერით ამ პირის პროფილიდან უკავშირდებოდნენ და დაურეკეს კიდეც. დავით ჭაბაშვილი მუქარაზე საუბრობს პირად ფეისბუქ გვერდზე გამოქვეყნებულ პოსტშიც. თავად ჟურნალისტი მომხდარს მის პროფესიულ საქმიანობას უკავშირებს. ის თავს საფრთხეში გრძნობს, ვინაიდან აგრესიულად განწყობილი პირისთვის ცნობილია მისი საცხოვრებელი მისამართი და საქმიანობის ადგილი. ჟურნალისტის ინფორმაციით, შსს-მ საქმის გამოძიება 151  მუხლით დაიწყო (სიცოცხლის მოსპობის ან ჯანმრთელობის დაზიანების მუქარა) და უკვე გამოკითხა დავით ჭაბაშვილი. 

ქარტია შსს-ს მოუწოდებს, დროულად გამოიძიოს ინციდენტი და მიიღოს ზომები დავით ჭაბაშვილის უსაფრთხოების უზრუნველსაყოფად. 

სამწუხაროდ, ამგვარ თავდასხმებს ჟურნალისტებზე ახალისებს უმაღლესი თანამდებობის პირების აგრესიული რიტორიკა დამოუკიდებელი მედიის მიმართ. ქარტია მათ მოუწოდებს, გაიაზრონ სიძულვილის ენის გამოყენების მოსალოდნელი შედეგები, რისი ერთი მაგალითიცაა მუქარა დავით ჭაბაშვილის მიმართ, და შესაბამისად შეცვალონ მიდგომები და დააკორექტირონ ქცევა.   

4 აპრილს „ქართული ოცნების“ ხელისუფლებამ აზერბაიჯანელი რეპრესირებული ჟურნალისტი, აფგან სადიგოვი, დააკავა და საერთაშორისო სამართლის ნორმების დარღვევით და საქართველოს საერთაშორისო ვალდებულებების უგულებელყოფით, „წარმოშობის ქვეყანაში“, აზერბაიჯანში, გააძევა.  

ადამიანის უფლებათა ევროპულმა სასამართლომ საქართველოს აუკრძალა, სასამართლოს მიერ აფგან სადიგოვის საქმეზე არსებითი გადაწყვეტილების მიღებამდე, მისი ექსტრადირება აზერბაიჯანში, სადაც ჟურნალისტი შეიძლებოდა დაქვემდებარებოდა წამებასა და არაადამიანურ მოპყრობას და სადაც მისი თავისუფლება და სიცოცხლე საფრთხის ქვეშ იქნებოდა. 

მრავალ კითხვას აჩენს აზერბაიჯანისა და საქართველოს ხელისუფლებების კრიტიკოსი ჟურნალისტის დაკავების დრო (ილჰამ ალიევის ვიზიტის წინა დღეებში), ფორმალური მიზეზი (ზოგადი ხასიათის პოსტი სოციალურ მედიაში), დაკავების ფორმა (მოტყუებითა და დიდი საპოლიციო მობილიზებით) და ნაჩქარევი სასამართლო პროცესი (ჩაინიშნა და ჩატარდა ღამით). 

Azel.tv-ს მთავარი რედაქტორი აფგან სადიგოვი ჟურნალისტური საქმიანობისთვის წლების განმავლობაში იდევნებოდა აზერბაჯანში. მის წინააღმდეგ ორჯერ იყო აღძრული სისხლის სამართლის საქმე. აზერბაიჯანულ ციხეში ჟურნალისტმა დიდი ხნის განმავლობაში იშიმშილა. 

2023 წელს აფგან სადიგოვი სერიოზულად შერყეული ჯანმრთელობით ჩამოვიდა საქართველოში სამკურნალოდ, ოჯახთან ერთად. თუმცა ის აქ თავს უსაფრთხოდ არ გრძნობდა და მესამე ქვეყანაში გასვლას გეგმავდა, რისი საშუალებაც ჟურნალისტს საქართველოს ხელისუფლებამ არ მისცა. 2024 წლის აგვისტოში აფგან სადიგოვს საექსტრადაციო პატიმრობა შეეფარდა. მან ქართულ ციხეში 141 დღე იშიმშილა. აფგან სადიგოვი პატიმრობიდან შარშან აპრილში, გირაოთი გათავისუფლდა. მისმა ოჯახმა საქართველო დატოვა.   

აფგან სადიგოვის სისხლის სამართლებრივი დევნა აზერბაიჯანში 1 აპრილს შეჩერდა, 3 აპრილს მას მოუხსნეს შეზღუდვა გადაადგილებაზე, 4 აპრილს კი დააკავეს. ამ დროისთვის ადვოკატებს პრაქტიკულად მზად ჰქონდათ დოკუმენტები ჟურნალისტის მესამე ქვეყანაში გასაყვანად, თუმცა ქართულმა სასამართლომ მას არ მისცა საშუალება, ქვეყანა ნებაყოფლობით დაეტოვებინა.  

აფგან სადიგოვის შემთხვევა აჩვენებს, თუ როგორ ეფექტურად შეუძლიათ თანამშრომლობა ავტორიტარულ ხელისუფლებებს კრიტიკულად განწყობილი ჟურნალისტების წინააღმდეგ, ადამიანის უფლებების ფეხქვეშ გასათელად და გამოხატვის თავისუფლების ჩასახშობად. 

ქარტია ჟურნალისტთა უფლებებზე მომუშავე საერთაშორისო ორგანიზაციებს მოუწოდებს, ყურადღება გამოიჩინონ აფგან სადიგოვის შემთხვევის მიმართ, იზრუნონ მის უსაფრთხოებაზე და გააკეთონ ყველაფერი, რაც შეუძლიათ, ჟურნალისტის დასაცავად აზერბაიჯანში, სადაც ის ამჟამად იმყოფება.   

შალვა პაპუაშვილმა პარლამენტში გამართული ბრიფინგის დროს ონლაინ გამოცემების (რადიო თავისუფლება, „ტაბულა“, პუბლიკა“ და „ნეტგაზეთი“) სტიგმატიზაცია სცადა ფრაზის „უცხოური დაფინანსების მქონე პარტიული პროპაგანდისტული ჯგუფები“ გამოყენებით და ისინი, ტელეკომპანია “პირველთან” ერთად, სინოდის საქმიანობაში ჩარევაში დაადანაშაულა.   

ქარტია მას შეახსენებს, რომ მედიის როლი და მოვალეობა ქვეყანაში მიმდინარე ყველა მნიშვნელოვანი საკითხის გაშუქება და საზოგადოების ინფორმირებაა ფაქტებისა და მოსაზრებათა მრავალფეროვნების შესახებ. ახალი პატრიარქის არჩევა ასეთ საკითხთა რიგშია და მედია საქართველოში ახლა აკეთებს ზუსტად იმას, რასაც უნდა აკეთებდეს - იძიებს ინფორმაციასა და კომენტარებს ამ საკითხის გარშემო და თავის აუდიტორიას უზიარებს. 

უმაღლესი თანამდებობის პირებმა უნდა შეწყვიტონ მედიასაშუალებებისა და ჟურნალისტების შევიწროება და დაშინება, კრიტიკული ხმების ჩახშობის მიზნით, და უნდა მისცენ მედიას საშუალება, სრულფასოვნად შეიტანოს წვლილი საზოგადოებრივი დისკურსის ფორმირებაში. 

ჟურნალისტური ეთიკის ქარტია ეხმაურება კომუნიკაციების ეროვნული კომისიის მიერ საქმის წარმოების დაწყებას „ფორმულასა“ და „ტვ პირველის“ წინააღმდეგ. 

ეს კი მაუწყებლობის შესახებ კანონში ერთი წლის წინ მიღებულ საკამათო ცვლილებებზე დაყრდნობით ხდება. ამ  ცვლილებებმა კანონის რეპრესიულ ინსტრუმენტად გამოყენების პოტენციალი გაზარდა და მარეგულირებელი უწყების უფლებამოსილება გააფართოვა. 

თუ 2025 წლის ზაფხულში კომისიას ამავე ტელეკომპანიების მიმართ „ქართული ოცნების“ საჩივარზე ჰქონდა რეაგირება, ახლა ის უკვე მედიამონიტორინგის მეშვეობით პროაქტიურად ცდილობს შესაძლო „დარღვევების“ შესახებ ინფორმაციის მოგროვებას. 

კომისია ტელეკომპანია “ფორმულას” მინიტორინგის პერიოდში (2026 წლის 23 თებერვალი - 11 მარტი) ახალი ამბების პროგრამებში მაუწყებლობის შესახებ კანონის 54-ე მუხლის “სამართლიანობა და  მიუკერძოებლობა” პირველი, მე-4 და მე-5 პუნქტების დარღვევას ედავება, ხოლო “ტვ პირველის” შემთხვევაში ამ ჩამონათვალს 52-ე მუხლის, “ფაქტის ჯეროვანი სიზუსტე და პასუხის უფლება”, პირველი მუხლიც ემატება. 2 აპრილს გამართულ სხდომაზე კომისიამ ამ საკითხებზე იმსჯელა. 

ამჯერად სამიზნეა ლექსიკა, რომელსაც მედიასაშუალებები თავიანთი სარედაქციო დამოუკიდებლობის ფარგლებში, გამოხატვის თავისუფლების დაცული უფლებით, იყენებენ არსებული რეალობის აღსაწერად. ასევე, მაუწყებლებს საყვედურობენ მმართველი ძალისა და სამთავრობო უწყებების კომენტარების გაუჟღერებლობისთვის. კრიტიკულ მაუწყებლებს, უკვე წლებია, უჭირთ კომენტარის მიღება მმართველი ძალის წარმომადგენლებისაგან, რომლებიც მათთან კითხვებით მისულ ჟურნალისტებს ხშირად თავს ესხმიან, შეურაცხყოფას აყენებენ და ამცირებენ. 

პროგრესი შესაძლებელია მხოლოდ პროფესიული დებატების მეშვეობით, ყველა აქტორისა და ყველა დაინტერესებული მხარის ჩართულობით. იმთავითვე ნათელია, რომ საეჭვო მოტივით გატარებული სადამსჯელო ღონისძიებები საქართველოში ჟურნალისტიკის ხარისხს ვერ გააუმჯობესებს. 

ჟურნალისტური ეთიკის ქარტია კომისიას მოუწოდებს, იმ რთულ ტექნიკურ საკითხებზე კონცენტრირდეს, რაც სატელეკომუნიკაციო  და სამაუწყებლო სექტორების წინსვლისთვის მნიშვნელოვანია და კომისიის ძირითად პასუხისმგებლობებს წარმოადგენს, ხოლო ჟურნალისტიკის განვითარებაზე, პროფესიულ სტანდარტებზე და მათი დაცვის გზებზე ზრუნვის შესაძლებლობა მისცეს თავად მედიასაშუალებებს, თვითრეგულირების ორგანოებს, პროფესიულ ასოციაციებს და საგანმანათლებლო ინსტიტუტებს. 

მართალია კომისიას, რომლის აფილიაციებიც მმართველ პარტიასა და მის პოლიტიკურ ინსტრუმენტად ქცეულ პროპაგანდისტულ მედიასაშუალებებთან საყოველათაოდაა ცნობილი და ფაქტობრივი გარემოებებით დასტურდება, განსაკუთრებული ძალისხმევა დასჭირდება სამაუწყებლო სექტორისთვის ობიექტურობის სადემონსტრაციოდ და მძიმე მემკვიდრეობის დასაძლევად, მას ჯერ კიდევ აქვს არჩევანი. 

კომისიას შეუძლია, საერთო მდგომარეობის გაჯანსაღებასა და საზოგადოებრივი დისკურსის დამაზიანებელი პოლარიზაციის დაძლევაში პოზიტიური წვლილი შეიტანოს - მოუწოდოს მმართველ პარტიას და სახელმწიფო ინსტიტუტებს, აქტიურად ითანამშრომლონ მათ მიმართ კრიტიკულად განწყობილ მედიასთან, რაც, პირველ რიგში, საზოგადოების ინტერესებშია, რომელიც მმართველი ძალის მიერ დამოუკიდებელი მედიისთვის გამოცხადებული ბოიკოტის გამო, უკვე წლებია, ინფორმაციას სრულფასოვნად ვერ იღებს. 

ან, კომისიას შეუძლია იქცეს ცენზორად და მიკრომენეჯერად უკვე ყოველმხრივ შევიწროებული და რესურსებისგან დაცლილი მედიისთვის, ცარისტული რუსეთის და საბჭოთა კავშირის საუკეთესო ტრადიციებით ჩაუსაფრდეს თითოეულ სიტყვასა და ფრაზას, დასაჯოს მედიასაშუალებები „ბალანსის დაუცველობისთვის“ იმ პირობებში, როცა „მეორე მხარისგან“ ინფორმაციისა და კომენტარის მოსაპოვებლად ჟურნალისტებს აღარავითარი ბერკეტი აღარ აქვთ შერჩენილი. 

იმას, თუ რა არჩევანს გააკეთებს კომისია, 8 აპრილს გავიგებთ, როცა ის „ფორმულასა“ და „ტვ პირველის“ საქმეებზე გადაწყვეტილებებს გამოაცხადებს.

ხადის ხეობაში, სოფელ წკერეში, ქვეშეთი-კობის გზის მშენებლობის გამო შექმნილი პრობლემების გასაშუქებლად ჩასულ „მთის ამბებისა“ და „საქართველოს ამბების“ გადამღებ ჯგუფს ადგილზე მყოფი პირები, სავარაუდოდ, მშენებლობაზე მომუშავე ჩინური სახელმწიფო კომპანიის და გზების დეპარტამენტის წარმომადგენლები და სამუშაოების ზედამხედველები, დაუპირისპირდნენ. გამოცემის ცნობით, ჩამოშლილი სასაფლაოს ფერდობზე კომპანიის წარმომადგენლები გარდაცვლილთა ნეშტებს ეძებდნენ, რა დროსაც ჟურნალისტებს გადაადგილება შეუზღუდეს, უცენზურო სიტყვების გამოყენებით სიტყვიერი შეურაცხყოფა მიაყენეს და გადაღების შეწყვეტა მოსთხოვეს. ერთ-ერთი მათგანი განსაკუთრებული აგრესიით გამოირჩეოდა. ვიდეოში, რომელიც „მთის ამბებმა“ გამოაქვეყნა, ისიც ჩანს, რომ ერთ-ერთი ადგილობრივი, მამუკა როსტიაშვილი, ჟურნალისტებს  სიცოცხლის მოსპობით ემუქრება. 

„მთის ამბების“ და „საქართველოს ამბების“ რედაქტორმა გელა მთივლიშვილმა რადიო თავისუფლებას უთხრა, რომ ამ საქმესთან დაკავშირებით პროკურატურამ გამოკითხვაზე დაიბარა. 

ჟურნალისტების თანმიმდევრულმა და მიზანმიმართულმა სტიგმატიზაციამ, სიძულვილის ენის ხშირმა გამოყენებამ და დაუსჯელობის სინდრომმა საქართველოში შექმნა კლიმატი, სადაც აგრესია მედიის მიმართ წახალისებულია. ამგვარი დამაზიანებელი მიდგომის შედეგებს ჟურნალისტები ყოველდღიურად გრძნობენ. 

ჟურნალისტური ეთიკის ქარტია ღრმა შეშფოთებას გამოთქვამს „მთის ამბებისა“ და „საქართველოს ამბების“ ჟურნალისტების მიმართ გაჟღერებული ძალადობისა და სიცოცხლის მოსპობის მუქარისა და მათთვის პროფესიული მოვალეობის შესრულებაში ხელშეშლისა გამო. თავდასხმა სისხლის სამართლის დანაშაულის აშკარა ნიშნებს შეიცავს. ქარტია პროკურატურას ამ შემთხვევის სწრაფად და ეფექტურად გამოიძიებისკენ მოუწოდებს, ხოლო შსს-ს ჟურნალისტებისთვის უსაფრთხო სამუშაო გარემოს უზრუნველყოფას თხოვს. 

საქართველოს ჟურნალისტური ეთიკის ქარტიას განცხადებით მომართა შპს “უნიქალმედის” დირექტორმა კახა ნურალიძემ.

სადავო მასალა ტელეკომპანია Mega TV-ის სოციალურ ქსელში 2026 წლის 24 თებერვალს გავრცელდა. ის ქუთაისში ექიმის მიერ თვითდაზიანებების მიყენების შესახებ გავრცელებულ ამბავს ეხება.

განმცხადებელი მიიჩნევს, რომ გავრცელებული ინფორმაცია არაზუსტი და გადაუმოწმებელია და დავობს ქარტიის პირველი (სიზუსტე) და მე-11 (ფაქტის განზრახ დამახინჯება) პრინციპების დარღვევაზე.

მოპასუხე ჟურნალისტად განმცხადებლის მხრიდან Mega TV-ის ჟურნალისტი თამარა ქავთარაძე განისაზღვრა.

ქარტიის საბჭო განცხადებას ღია სხდომაზე განიხილავს და გადაწყვეტს, დაირღვა თუ არა სადავო ჟურნალისტურ პროდუქტში ქარტიის პრინციპები.

20 თებერვალს, ჟურნალისტური ეთიკის ქარტიის საბჭომ განიხილა ნინო დათაშვილის განცხადება  ტელეკომპანია “იმედის” ჟურნალისტის გიორგი აბაზაძის წინააღმდეგ. 

სადავო სიუჟეტი ტელეკომპანია “იმედის” ეთერში ორ სხვადასხვა საინფორმაციო გამოშვებაში 2025 წლის 6 აგვისტოს გავიდა. ის ეხება ნინო დათაშვილის ჯანმრთელობის მდგომარეობასა და კონფლიქტს მასსა და სასამართლოს მანდატურებს შორის.

განმცხადებელი დავობდა ქარტიის პირველი (სიზუსტე), მე-7 (დისკრიმინაცია), მე-10 (პირადი ცხოვრების ხელშეუხებლობა) და მე-11 (ფაქტის განზრახ დამახინჯება) პრინციპების დარღვევაზე.

საბჭოს გადაწყვეტილებით, ტელეკომპანია “იმედის” ჟურნალისტმა გიორგი აბაზაძემ ქარტიის პირველი და მე-7 პრინციპები დაარღვია, ხოლო მე-10 და მე-11 პრინციპების დარღვევა საბჭომ არ  დაადგინა.

მოპასუხე მხარე სხდომას არ დასწრებია და არც საკუთარი წერილობითი პოზიცია წარუდგენია საქმესთან დაკავშირებით.

საქმეზე სამოტივაციო ნაწილი მოგვიანებით გამოქვეყნდება.

20 მარტს, ჟურნალისტური ეთიკის ქარტიის საბჭომ განიხილა რამაზ სამხარაძის განცხადება  ტელეკომპანიის “იმედი” გადაცემის “იმედის კვირა” ავტორისა და წამყვანის, ირაკლი ჩიხლაძის, ასევე ჟურნალისტების, ანუკი გუმბერიძისა და სანდრო გამსახურდიას, წინააღმდეგ. 

სადავო ჟურნალისტური პროდუქტი ტელეკომპანიის “იმედი” გადაცემის “იმედის კვირა” ეთერში 2025 წლის 30 ნოემბერს გავიდა. ჟურნალისტურ გამოძიებაში რადიო “თბილისი”, სხვა მედიასაშუალებებთან ერთად, წარმოჩენილი იყო როგორც “უცხოური გავლენის აგენტი” და “უცხოური სპეცსამსახურების ინტერესების გამტარებელი/მართული სტრუქტურა”.

განმცხადებელი დავობდა ქარტიის პირველი (სიზუსტე), მე-3 (დადასტურებული წყარო), მე-5 (შესწორების ვალდებულება) პრინციპების დარღვევაზე.

განხილვის პროცესში, განმცხადებელმა მე-3 პრინციპი მოხსნა. 

საბჭოს გადაწყვეტილებით, ტელეკომპანიის “იმედი” ავტორმა და წამყვანმა ირაკლი ჩიხლაძემ, ასევე, ამავე მედიასაშუალების ჟურნალისტებმა ანუკი გუმბერიძემ და სანდრო გამსახურდიამ დაარღვიეს პირველი და მე-5 პრინციპები. 

მოპასუხე მხარე სხდომას არ დასწრებია და პოზიცია წერილობით არ წარმოუდგენია. 

საქმეზე სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიას განცხადებით მომართა ლიანა ყვარელაშვილმა საინფორმაციო ინტერნეტ ჟურნალის Geolite.ge-ს წინააღმდეგ. 

სადავო მასალა საინფორმაციო ინტერნეტ ჟურნალის სოციალურ ქსელში 2026 წლის 4 თებერვალს გამოქვეყნდა. განმცხადებელი მიიჩნევს, რომ სადავო მასალაში დარღვეულია ჟურნალისტური ეთიკის სტანდარტები.

განმცხადებელი დავობს ქარტიის პირველი (სიზუსტე), მე-3 (დადასტურებული წყარო), მე-4 (კეთილსინდისიერება), მე-5 (შესწორება), მე-10 (პირადი ცხოვრების ხელშეუხებლობა) და მე-11 (ფაქტის განზრახ დამახინჯება) პრინციპების დარღვევაზე.

მოპასუხე ჟურნალისტად საინფორმაციო ინტერნეტ ჟურნალის Geolite.ge-ს არაიდენტიფიცირებული ჟურნალისტი განისაზღვრა.

ქარტიის საბჭო განცხადებას ღია სხდომაზე განიხილავს და გადაწყვეტს, დაირღვა თუ არა სადავო ჟურნალისტურ პროდუქტში ქარტიის პრინციპები.

20 მარტს, 20:00 საათზე, ქარტიის საბჭო განიხილავს რამაზ სამხარაძის განცხადებას ტელეკომპანია “იმედის” გადაცემის “იმედის კვირა” ავტორის და წამყვანის, ირაკლი ჩიხლაძის, და ამავე ტელეკომპანიის ჟურნალისტების ანუკი გუმბერიძისა და სანდრო გამსახურდიას წინააღმდეგ. 

სადავო სიუჟეტი “უცხოური სპეცსამსახურების მედიაქსელი” ტელეკომპანია “იმედის” ეთერში, გადაცემა “იმედის კვირაში”, გავიდა 2025 წლის  30 ნოემბერს. განმცხადებელი მიიჩნევს, რომ აღნიშნულ სიუჟეტში ის და მისი მედიაორგანიზაცია (რადიო თბილისი) უსაფუძვლოდ და დაუსაბუთებლად წარმოაჩინეს როგორც “უცხოური გავლენის აგენტები” და “უცხოური სპეცსამსახურების ინტერესების გამტარებელი/მართული სტრუქტურა”.

განმცხადებელი დავობს ქარტიის პირველი (სიზუსტე), მე-3 (დადასტურებული წყარო) და მე-5 (შესწორება) პრინციპების დარღვევაზე.

მოპასუხე ჟურნალისტებად განმცხადებლის მხრიდან განისაზღვრნენ ირაკლი ჩიხლაძე, ანუკი გუმბერიძე და სანდრო გამსახურდია. 

ქარტიის საბჭო განცხადებას განიხილავს და გადაწყვეტს, დაირღვა თუ არა სადავო ჟურნალისტურ პროდუქტში ქარტიის პრინციპები.

სხდომა წარიმართება ონლაინ რეჟიმში, პლატფორმა ZOOM-ის მეშვეობით. საქმის განხილვა ღიაა და ნებისმიერ მსურველს შეუძლია დასწრება. სხდომაზე დასწრებისთვის საჭირო მონაცემების მისაღებად, მოგვწერეთ მეილზე: ethicscharter@gmail.com