საქართველოს ჟურნალისტური ეთიკის ქარტიის საბჭოს სამდივნომ დასაშვებად ცნო გიორგი ხუჭუას განცხადება მთავარი არხის წინააღმდეგ.

სადავო გადაცემა ტელეკომპანიის ეთერში, 2021 წლის 19 ივნისს გავიდა.

განმცხადებლის პოზიციით, გადაცემაში მის წინააღმდეგ გაჟღერებული ბრალდებები სიმართლეს არ შეესაბამებოდა და მიზნად ისახავდა მის დისკრედიტაციას.

განმცხადებელი დავობს ქარტიის შემდეგი პრინციპიების დარღვევაზე:

• პირველი (ინფორმაციის სიზუსტე);
• მესამე (დადასტურებული წყარო);
• მეოთხე (ინფორმაციის მოპოვების კეთილსინდისიერი მეთოდები);
• მეხუთე (შესწორება);
• მეთერთმეტე (ფაქტის განზრახ დამახინჯება).

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის საბჭოს სამდივნომ დასაშვებად ცნო "სოლიდარობის თემის" განცხადება ტელეკომპანია “იმედის”, გადაცემა “იმედის ფაქტორის” წამყვანის - მაგდა ანიკაშვილის წინააღმდეგ.

სადავო გადაცემა ტელეკომპანიის ეთერში, 2021 წლის 16 ივნისს გავიდა და საპატრიარქოს ფერიის პანსიონატში განვითარებულ ამბებს ეხებოდა.

განმცხადებლის პოზიციით, გადაცემაში მოწვეულმა სტუმარმა თეა დარჩიამ არასწორი ინფორმაცია გაავრცელა მედრესეებსა და სხვა მსგავს დაწესებულებებში ბავშვთა გაგზავნასთან დაკავშირებით. მხარის განმარტებით, რესპონდენტის ფრაზები იყო დისკრიმინაციული მუსლიმური და კათოლიკური სასწავლებლების მიმართ, ხოლო ჟურნალისტი არ გაემიჯნა მსგავს განცხადებებს და არც სხვა სახის რეაგირება მოუხდენია.

განმცხადებელი დავობს ქარტიის პირველი (ინფორმაციის სიზუსტე), მეხუთე (შესწორება) და მეშვიდე (დისკრიმინაცია) პრინციპების დარღვევაზე.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

კოალიცია „მედიის ადვოკატირებისათვის" წევრი ორგანიზაციები მივმართავთ საქართველოს შინაგან საქმეთა სამინისტროს TV პირველის ჟურნალისტსა და ოპერატორზე თავდასხმის ფაქტზე დაწყებული გამოძიება სწრაფად და ეფექტურად წარმართოს.

დღეს, 2021 წლის 30 ივნისს გავრცელებულ ვიდეოში ჩანს, რომ მედიის წარმომადგენლებს წალკაში თავს დაესხნენ, მიაყენეს სიტყვიერი და ფიზიკური შეურაცხყოფა, არ მისცეს პროფესიული მოვალეობის შესრულების შესაძლებლობა.

სამწუხაროდ, ამ დრომდე შინაგან საქმეთა სამინისტროს მსგავს დანაშაულებზე მყისიერი რეაგირება არ მოუხდენია, რაც ერთგვარად ახალისებს მედიის წინააღმდეგ არსებულ აგრესიას.

საქართველოს ჟურნალისტური ეთიკის ქარტიის საბჭო 1 ივლისს 2 საქმეს ონლაინ განიხილავს:

1. 19:00 საათზე - გიორგი ფეიქრიშვილი ტელეკომპანია „ფორმულას” ჟურნალისტის ბაია დვალიშვილის წინააღმდეგ

სადავო გადაცემა ტელეკომპანია „ფორმულას” ეთერში 2020 წლის 30 ნოემბერს გავიდა. განმცხადებლის განმარტებით, სიუჟეტში გადმოცემული ინფორმაცია მასზე, როგორც მოძალადედ წარმოჩენაზე სიმართლეს არ შეესაბამება, ჟურნალისტს კი არ უცდია სიზუსტის მასთან, როგორც მხარესთან გადამოწმება. განმცხადებელი მიიჩნევს, რომ მსგავსი ფორმით გავრცელებული ინფორმაციით მას რეპუტაციული ზიანი მიადგა.

მხარე თვლის, რომ დარღვეულია ქარტიის პირველი (ინფორმაციის სიზუსტე), მესამე (დადასტურებული წყარო), მეხუთე (არაზუსტი ინფორმაციის შესწორება), მეშვიდე (დისკრიმინაცია), მეცხრე (სარედაქციო და სარეკლამო მასალების გამიჯვნა), მეათე (პირადი ცხოვრების ხელშეუხებლობა) და მეთერთმეტე (ფაქტის განზრახ დამახინჯება) პრინციპი.

2. 20:30 საათზე - ლევან დოსმიშვილი TV პირველის ჟურნალისტების ნოდარ მელაძე და მარიამ გაფრინდაშვილი წინააღმდეგ

სადავო სიუჟეტი, „ტვ პირველის” ეთერში 2020 წლის 21 ნოემბერს გავიდა და თემქაზე მომხდარ მკვლელობას ეხებოდა. განმცხადებლის განმარტებით, მკვლელობის დეტალებზე სიუჟეტში გადმოცემული ინფორმაცია სიმართლეს არ შეესაბამება, ჟურნალისტი კი ინფორმაციის გადასამოწმებლად მას არ დაკავშირებია. განმცხადებელი ასევე მიიჩნევს, რომ ჟურნალისტი ფლობდა საქმის დეტალებზე ინფორმაციას, მაგრამ განზრახ არ გაასაჯაროვა.

მხარე თვლის, რომ დარღვეულია ქარტიის პირველი (ინფორმაციის სიზუსტე), მეხუთე (არაზუსტი ინფორმაციის შესწორება) და მეთერთმეტე (ფაქტის განზრახ დამახინჯება) პრინციპი. 

სხდომა გაიმართება ონლაინ, პროგრამა Zoom-ის მეშვეობით. სხდომაზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება.

საქართველოს ჟურნალისტური ეთიკის ქარტიის საბჭოს გადაწყვეტილებით, მედია-კავშირი “ობიექტივის” ჟურნალისტმა ქეთი შერგელაშვილმა ქარტიის პირველი - ინფორმაციის სიზუსტის პრინციპი დაარღვია.

მის წინააღმდეგ ქარტიას მარიამ არველაძემ მომართა. სადავო ჟურნალისტური პროდუქტი “ლელოს“ არარეალური შემომწირველები” ტელეკომპანიის ეთერში, გადაცემაში “ნამდვილი ამბები” , 2020 წლის 14 ოქტომბერს გავიდა.

განმცხადებელი განმარტავდა, რომ სიუჟეტში გადმოცემული ინფორმაცია პოლიტიკური პარტია “ლელოსადმი” შემოწირულობების შესახებ არასწორია. განმცხადებელი ასევე დავობდა ქარტიის მეთერთმეტე (ფაქტის განზრახ დამახინჯება) პრინციპის დარღვევაზე, მაგრამ საბჭოს ამ ნაწილზე დარღვევა არ დაუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, “მთავარი არხის” ჟურნალისტმა ბექა ყორშიამ ქარტიის პირველი - ინფორმაციის სიზუსტე და მეთერთმეტე - ფაქტის განზრახ დამახინჯება პრინციპები დაარღვია.

მის წინააღმდეგ ქარტიას მიტროპოლიტმა ნიკოლოზმა მომართა.

სადავო ჟურნალისტური სიუჟეტი „მღვდლების ვნებანი”, ტელეკომპანიის ეთერში, გადაცემაში - „მთავარი შაბათს მიშა სესიაშვილთან ერთად”, 2020 წლის 5 დეკემბერს გავიდა.

განმცხადებლის განმარტავდა, რომ სიუჟეტში გადმოცემული ინფორმაცია, თითქოს, სექს-შოპმა მას საჩუქარი გადასცა, სიმართლეს არ შეესაბამებოდა. მხარე მიიჩნევდა, რომ ჟურნალისტის მხრიდან ამბის ამ ფორმით გაჟღერება ეფუძნებოდა ცრუ ბრალდებებს.

განმცხადებელი ასევე დავობდა ქარტიის მესამე (დადასტურებული წყარო), მეხუთე (შესწორება) და მეშვიდე (დისკრიმინაცია) პრინციპების დარღვევაზე, მაგრამ საბჭოს ამ ნაწილებზე დარღვევა არ დაუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, ტელეარხ “რუსთავი 2-ის”, გადაცემა “ღამის კურიერის” წამყვანებს, დავით კაკულიას და ირაკლი იმნაიშვილს ქარტიის მეშვიდე - დისკრიმინაციის პრინციპი არ დაურღვევიათ.

მათ წინააღმდეგ ქარტიას სალომე კვირიკაშვილმა, მარიამ ქრისტესიაშვილმა, კესო ქარდავამ და იაგო შაკაიამ მომართა.

განმცხადებლების განმარტებით, გადაცემაში მოწვეულმა სტუმარმა, ირაკლი კობახიძემ, საქართველოს საერთაშორისო პარტნიორებზე საუბრისას გამოიყენა ოჯახში ძალადობის შემთხვევის ანალოგია. განმცხადებლების პოზიციით, შედარება იყო შეუსაბამო და აძლიერებდა ოჯახური ძალადობის მიმართ საზოგადოებაში არსებულ არასწორ და სტიგმის შემცველ დამოკიდებულებებს. განმცხადებლები მიუთითებდნენ, რომ წამყვანს არ დაუსვამს დამაზუსტებელი შეკითხვები და არც ნათქვამის განმარტება უთხოვია სტუმრისათვის.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭოს გადაწყვეტილებით, კომედი არხზე გასულ იუმორისტულ ეპიზოდში ქარტიის მეშვიდე - დისკრიმინაციის პრინციპი დაირღვა.

ქარტიას განცხადებით ქალთა ინიციატივების მხარდამჭერმა ჯგუფმა მომართა. სადავო ჟურნალისტური პროდუქტი ტელეკომპანიის ეთერში, გადაცემაში “სიცილის ზონა” , 2020 წლის 12 ნოემბერს გავიდა და სიუჟეტი სექსუალურ ძალადობას ეხებოდა.

განმცხადებელი განმარტავდა, რომ თემა ისეთი ფორმით იყო წარმოჩენილი, ახდენდა გაუპატიურების და მსგავსი ძალადობრივი ქმედების ნორმალიზებას.

გადაწყვეტილების სამოტივაციო ნაწილი მოგვიანებით გამოქვეყნდება.

„პრაიდ კვირეული“ თბილისში 1 ივლისს გაიხსნება და 5 ივლისს, ღირსების მარშით დასრულდება. ამასთან დაკავშირებით ულტრარადიკალურმა ჯგუფებმა კვირეულის წინააღმდეგ აქციები დააანონსეს. 

ქარტია მოუწოდებს მედიას გამოიჩინოს სიფრთხილე ძალადობრივი ჯგუფების გაშუქებისას და არ შეუწყოს ხელი დისკრიმინაციის წახალისებას. დემოკრატიულ საზოგადოებაში გამოხატვის თავისუფლება არის უმნიშვნელოვანესი ღირებულება და მისი შეზღუდვის უფლება არავის აქვს. შესაბამისად, აუცილებელია მედიამ გამოიჩინოს წინდახედულება და ეთიკურად გააშუქოს პრაიდის კვირეული.

მედიას აქვს სოციალური პასუხისმგებლობა, არა მხოლოდ არ გაამძაფროს დისკრიმინაცია, არამედ საზოგადოებაში არსებულ ირაციონალური შიშების და ზიზღის წინააღმდეგ საინფორმაციო ქმედებები განახორციელოს. 

ჟურნალისტური ეთიკის ქარტიის საბჭო ჟურნალისტებს რამდენიმე რეკომენდაციით მიმართავს:

• ულტრამემარჯვენე ჯგუფების გაშუქებისას საზოგადოებას მიაწოდეთ ინფორმაცია მათი მიზნებისა და მოტივაციების შესახებ; 
• ეცადეთ ხელი არ შეუწყონ არატოლერანტული, დისკრიმინაციული გარემოს ჩამოყალიბებას, სიძულვილის წახალისებას;
• სიძულვილის ენის შემცველი მასალის განთავსებისას ცხადად უნდა გამოკვეთოთ გაშუქების მიზანი. აჩვენეთ, რომ ემიჯნებით ამგვარ გამონათქვამებსა და პოზიციას. გამიჯვნა არ გულისხმობს მაინცდამაინც სიტყვიერად მითითებას „ვემიჯნებით რესპონდენტის მოსაზრებებს”. შესაძლებელია, სხვა ფორმით და სხვა ტექსტით არ გაიზიაროთ რესპონდენტის პოზიცია;
• არ დაუთმოთ ეთერი ძალადობისკენ მოწოდებებს, სიძულვილის ენას. 

საქართველოს ჟურნალისტური ეთიკის ქარტიის საბჭოს გადაწყვეტილებით, “TV 25-ის” ჟურნალისტმა თეო ფუტკარაძემ ქარტიის პირველი - ინფორმაციის სიზუსტის პრინციპი დაირღვა.

მის და სულხან მესხიძის წინააღმდეგ ქარტიას ფირუზ ბოლქვაძემ მომართა. თუმცა სულხან მესხიძეს დარღვევა არ დაუდგინდა.

განმცხადებელი განმარტავდა, რომ მასალაში გაჟღერებული ფაქტები არ შეესაბამებოდა სინამდვილეს და მათი გავრცელება მიზნად ისახავდა აჭარის ტელევიზიისა და რადიოს მოქმედი მენეჯმენტის დისკრედიტაციას.

განმცხადებელი ასევე დავობდა ქარტიის მეორე (ჟურნალისტის იძულება), მეხუთე (შესწორება) და მეთერთმეტე (ფაქტის განზრახ დამახინჯება) პრინციპების დარღვევაზე, მაგრამ საბჭოს ამ ნაწილებზე დარღვევა არ დაუდგენია.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის საბჭო 24 ივნისს 3 საქმეს ონლაინ განიხილავს:

1. 18:00 საათზე - მიტროპოლიტი ნიკოლოზი ბექა ყორშიას წინააღმდეგ

სადავო ჟურნალისტური პროდუქტი „მღვდლების ვნებანი”, „მთავარი არხის” ეთერში, გადაცემაში - „მთავარი შაბათს მიშა სესიაშვილთან ერთად”, 2020 წლის 5 დეკემბერს გავიდა.

განმცხადებლის განმარტებით, სიუჟეტში გადმოცემული ინფორმაცია, თითქოს, სექსშოპმა მას საჩუქარი გადასცა, სიმართლეს არ შეესაბამება. მხარე მიიჩნევს, რომ ჟურნალისტის მხრიდან ამბის ამ ფორმით გაჟღერება დისკრიმინაციულია და ეფუძნება ცრუ ბრალდებებს.

მხარე თვლის, რომ დარღვეულია ქარტიის პირველი (ინფორმაციის სიზუსტე), მესამე (დადასტურებული წყარო), მეხუთე (არაზუსტი ინფორმაციის შესწორება), მეშვიდე (დისკრიმინაცია) და მეთერთმეტე (ფაქტის განზრახ დამახინჯება) პრინციპი.

2. 19:30 საათზე - ქალთა ინიციატივების მხარდამჭერი ჯგუფი (WISG) კომედი არხის წინააღმდეგ

სადავო მასალა ტელეკომპანია „კომედი არხის” ეთერში 2020 წლის 12 ნოემბერს გავიდა.

განმცხადებლის განმარტებით, გადაცემაში გავიდა ე.წ. „სკეჩი”, რომლის თემა იყო გაუპატიურება. მხარე მიიჩნევს, რომ თემა ისეთი ფორმით არის წარმოჩენილი, რომ ახდენს გაუპატიურებისა და მსგავსი ძალადობრივი ქმედების ნორმალიზებას. ასევე, ხელს უწყობს ძალადობის მსხვერპლი ადამიანების რეტრავმირებასა და მათ დისკრიმინაციას.

მხარე თვლის, რომ დარღვეულია ქარტიის მეშვიდე (დისკრიმინაცია) პრინციპი.

3. 20:30 საათზე -  სალომე კვირიკაშვილი მარიამ ქრისტესიაშვილი კესო ქარდავა იაგო შაკაია რუსთავი 2-ის ჟურნალისტების დავით კაკულიას და ირაკლი იმნაიშვილის წინააღმდეგ 

სადავო ჟურნალისტური პროდუქტი რუსთავი 2-ის ეთერში, გადაცემაში - „ღამის კურიერი” 2020 წლის 19 ნოემბერს გავიდა. განმცხადებლების განმარტებით, გადაცემაში მოწვეულმა სტუმარმა, ირაკლი კობახიძემ, საქართველოს საერთაშორისო პარტნიორებზე საუბრისას გამოიყენა ოჯახში ძალადობის შემთხვევის ანალოგია.

განმცხადებლების პოზიციით, შედარება იყო შეუსაბამო და აძლიერებდა ოჯახური ძალადობის მიმართ საზოგადოებაში არსებულ არასწორ და სტიგმის შემცველ დამოკიდებულებებს. განმცხადებლები მიუთითებენ, რომ წამყვანს არ დაუსვამს დამაზუსტებელი შეკითხვები და არც ნათქვამის განმარტება უთხოვია სტუმრისათვის.

მხარე თვლის, რომ დარღვეულია ქარტიის მეშვიდე (დისკრიმინაცია) პრინციპი. 

სხდომა გაიმართება ონლაინ, პროგრამა Zoom-ის მეშვეობით. სხდომაზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება.

საქართველოს ჟურნალისტური ეთიკის ქარტიის საბჭოს სამდივნომ დასაშვებად ცნო კავშირ “საფარის” განცხადება TV პირველის ჟურნალისტის - ნატო გოგელიას წინააღმდეგ.

სადავო გადაცემა - ”ციხეში, შვილიშვილზე სექსუალური ძალადობისთვის” ტელეკომპანიის ეთერში, 2021 წლის 07 ივნისს გავიდა.

განმცხადებლის პოზიციით, მასალაში მოხდა სავარაუდო სექსუალური შევიწროების მსხვერპლი ბავშვის იდენტიფიცირება, რაც კავშირი “საფარის” განმარტებით არღვევს ქარტიის მერვე პრინციპს - “ჟურნალისტი ვალდებულია, დაიცვას ბავშვის უფლებები; პროფესიული საქმიანობისას უპირატესი მნიშვნელობა მიანიჭოს ბავშვის ინტერესებს, არ მოამზადოს და არ გამოაქვეყნოს ბავშვების შესახებ ისეთი სტატიები ან რეპორტაჟები, რომლებიც საზიანო იქნება მათთვის. “

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.