საქართველოს ჟურნალისტური ეთიკის ქარტიის საბჭოს გადაწყვეტილებით, მაია სტეფნაძემ ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპები დაარღვია.

მის წინააღმდეგ ქარტიას ენკა რინიუებლზმა მომართა. სადავო ჟურნალისტური პროდუქტი ტელეკომპანია პირველის ეთერში 2021 წლის 07 მარტს გავიდა ნამახვანი ჰესის მშენებლობას ეხებოდა.

განმცხადებლის განმარტებით, ჟურნალისტმა არაერთხელ გააჟღერა ცრუ და გადაუმოწმებელი ინფორმაცია, რაც საზოგადოების შეცდომაში შემყვანია. განმცხადებლის თქმით, მაია სტეფნაძემ ასევე დისკრიმინაციული ენის გამოყენებით ხელი შეუწყო ქსენოფობიური შეხედულებების გავრცელებას საზოგადოებაში.

გადაწყვეტილების სამოტივაციო ნაწილი მოგვიანებით გამოქვეყნდება.

საქართველოს ჟურნალისტური ეთიკის ქარტიის სამდივნომ დასაშვებად ცნო ორგანიზაციის „საქართველოს ახალგაზრდა იურისტთა ასოციაცია" განცხადება ტელეკომპანია „იმედია" ჟურნალისტისტების ნათია სონღულაშვილის, ლევან ჯავახიშვილის, ხატია ქვათაძის, ლევან კვატაშიძისა და ნინო თოლორდავას წინააღმდეგ.

სადავო სამი ჟურნალისტური პროდუქტია, რომლებიც 2021 წლის 20 სექტემბერს გავიდა ეთერში.

განმცხადებლების პოზიციით, მასალებში არასწორი ინფორმაციაა გავრცელებული და ორგანიზაციის დისკრედიტაციას ემსახურება.

განმცხადებელი დავობს ქარტიის შემდეგი პრინციპების დარღვევაზე:

• პირველი - ინფორმაციის სიზუსტე;
• მეთერთმეტე - ფაქტის განზრახ დამახინჯება.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის სამდივნომ დასაშვებად ცნო შიო ხიდაშელის განცხადება მედიაგამოცემა „ალიას” წინააღმდეგ.

სადავო მასალა ვებ-გვერდზე 2021 წლის 13 ოქტომბერს განთავსდა.

განმცხადებლების პოზიციით, ჟურნალისტურ პროდუქტში ფაქტები არ არის არგუმენტებით გამყარებული და ინფორმაცია მადისკრედიტირებელია.

განმცხადებელი დავობს ქარტიის შემდეგი პრინციპების დარღვევაზე:

• პირველი - ინფორმაციის სიზუსტე;
• მესამე - დადასტურებული წყარო;
• მეოთხე - ინფორმაციის მოპოვების კეთილსინდისიერი მეთოდები;
• მეშვიდე - დისკრიმინაცია;
• მეთერთმეტე - ფაქტის განზრახ დამახინჯება.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის საბჭო 23 ოქტომბერს 4 საქმეს განიხილავს: 

12:00 საათზე - მწვანე ალტერნატივა ტელეკომპანია „პირველის" ჟურნალისტების ეკა მიშველაძისა და ალექსი პეტრიაშვილის წინააღმდეგ

სადავო გადაცემა, „პოლიტიკური პარასკევი”, ტელეკომპანიის ეთერში 2021 წლის 21 მაისს გავიდა და ნამახვანი ჰესის მშენებლობას ეხებოდა.

განმცხადებლების პოზიციით, სადავო მასალაში გაჟღერებული ინფორმაცია სიმართლეს არ შეესაბამება და ცალმხრივად არის წარმოდგენილი.  

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე), მესამე (დადასტურებული წყარო) და მეთერთმეტე (ფაქტის განზრახ დამახინჯება) პრინციპი. 

15:00 საათზე - გულნარა ძირკვაძე რადიო „მარნეულის" ჟურნალისტის თეა დავაძისა და ტელეკომპანია „მარნეულის" ჟურნალისტის ლელა ხარშილაძის წინააღმდეგ

ორივე მედიასაშუალებაზე გამოქვეყნებული სადავო სიუჟეტი იდენტურ თემაზე, სოფელ ახალი დიოკნისეში მდებარე სადავო მიწებზე მომზადდა. განმცხადებლის განმარტებით, მასზე და მის ოჯახზე გავრცელებული ინფორმაცია, მიწის საკუთრებასთან დაკავშირებით სიმართლეს არ შეესაბამება და ჟურნალისტს არ უცდია ამბის მასთან, როგორც მხარესთან გადამოწმება.

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე) პრინციპი.

17:00 საათზე - ენკა რინიუებლზ ტელეკომპანია „პირველის" ჟურნალისტის მაია სტეფნაძის წინააღმდეგ

სადავო გადაცემა - „ხალხი ხალხისთვის მაია სტეფნაძესთან ერთად“, ტელეკომპანია „პირველის" ეთერში 2021 წლის 07 მარტს გავიდა და ნამახვანი ჰესის მშენებლობას ეხებოდა.

განმცხადებლის განმარტებით, ჟურნალისტმა არაერთხელ გააჟღერა ცრუ და გადაუმოწმებელი ინფორმაცია, რაც საზოგადოების შეცდომაში შემყვანია. განმცხადებლის თქმით, მაია სტეფნაძემ ასევე დისკრიმინაციული ენის გამოყენებით ხელი შეუწყო ქსენოფობიური შეხედულებების გავრცელებას საზოგადოებაში. 

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე) და მეშვიდე (დისკრიმინაცია) პრინციპი. 

სხდომას შეგიძლიათ დაესწროთ ონლაინ. სურვილი შემთხვევაში შეგიძლიათ  მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება. 

 

13 ოქტომბერს საპარლამენტო უმრავლესობის წევრების მიერ ინიცირებული კანონპროექტი, რომელიც საარჩევნო კამპანიისას პოლიტიკური სუბიექტის მიმართ უარყოფითი დამოკიდებულების შემქმნელი სააგიტაციო და სარეკლამო მასალის გავრცელების აკრძალვას ითვალისწინებს, ეწინააღმდეგება საქართველოს კანონმდებლობით დადგენილ გამოხატვის თავისუფლების მაღალ სტანდარტს, არ არის განჭვრეტადი და არ ემსახურება საარჩევნო გარემოს გაუმჯობესებას.

მმართველი პარტიის წევრების მიერ წარდგენილი კანონპროექტი საქართველოს საარჩევნო კოდექსსა და „მაუწყებლობის შესახებ” საქართველოს კანონში რიგი ცვლილებების შეტანას ითვალისწინებს. მათ შორის, იკრძალება სატელევიზიო პოლიტიკური რეკლამის და სააგიტაციო მასალის საჯარო სივრცეში გავრცელება, რომელიც გამიზნულია საარჩევნო კანდიდატის მიმართ უარყოფითი დამოკიდებულების შესაქმნელად. კანონპროექტით, ასევე, დგინდება, რომ წინასაარჩევნო რეკლამის გავრცელება დასაშვებია მხოლოდ საარჩევნო სუბიექტის დაკვეთით და რეკლამა არ უნდა შეიცავდეს სხვა პოლიტიკური პარტიის გამოსახულებას, სახელწოდებას, რიგით ნომერსა და სიმბოლიკას.

აღნიშნულ მოთხოვნათა დარღვევისათვის პასუხისმგებლობა ეკისრება როგორც მაუწყებელს, ისე წინასაარჩევნო რეკლამის დამკვეთს. სააგიტაციო მასალის მოთხოვნის დარღვევით გავრცელება კი იწვევს გამავრცელებლისა და გავრცელების დამკვეთის დაჯარიმებას, თითოეულის - 2000 ლარით. კომპეტენციის ფარგლებში ჯარიმის დაკისრებაზე პასუხისმგებელია ცესკო და კომუნიკაციების კომისია.

წარმოდგენილი კანონპროექტი ეწინააღმდეგება გამოხატვისა და მედიის თავისუფლების დაცვის არსებულ სტანდარტებს. მნიშვნელოვანია, რომ პარტიებს და მათ წევრებს ჰქონდეთ უფლება, მონაწილეობა მიიღონ პოლიტიკურ და საჯარო დებატებში, მიუხედავად იმისა, რომ მათი პოზიცია შესაძლოა არ ემთხვეოდეს ხელისუფლების პოლიტიკას ან იყოს არაპოპულარული ან შეურაცხმყოფელი რომელიმე ჯგუფისთვის.

ვენეციის კომისიის განმარტებით, პოლიტიკური კამპანიის კონტექსტში, არ შეიძლება სახელმწიფომ მიიღოს ისეთი კანონი, რომელიც სხვების უფლებების ან რეპუტაციის დაცვის მიზნით ზღუდავს პოლიტიკური სუბიექტის გამოხატვის თავისუფლებას. აგრეთვე, ისეთი ტერმინები, როგორიცაა მაგალითად “კანდიდატის პატივისა და ღირსების შელახვა”, ვენეციის კომისიამ მიიჩნია ფართო და ზოგად ფორმულირებად, რომელიც შეიცავს გამოხატვის თავისუფლების მომეტებული და არათანაზომიერი შეზღუდვის რისკებს. ასეთმა ფართო განმარტებამ შესაძლებელია გამოიწვიოს ინტენსიური პოლიტიკური კამპანიის შეფერხება, რაც განსაკუთრებით მნიშვნელოვანია საარჩევნო პროცესების სათანადოდ და საერთაშორისო სტანდარტების შესაბამისად წარმართვისთვის. გარდა ამისა, ევროპულ სტანდარტებს ეწინააღმდეგება ისეთი საარჩევნო კანონმდებლობა, რომელიც კრძალავს სააგიტაციო მასალებში კანდიდატების შეურაცხმყოფელ კონტექსტში მოხსენიებას.

რაც შეეხება ინიცირებული ცვლილებებით მედიის თავისუფლების შეზღუდვას, გაერთიანებული ერების ორგანიზაციის სპეციალური მომხსენებელი განმარტავს, რომ მედია არ უნდა იყოს სამართლებრივად პასუხისმგებელი კანონთან შეუსაბამო ისეთი განცხადებისთვის, რომელიც გაკეთებულია საარჩევნო კამპანიის ფარგლებში. ეს მიდგომა ხაზს უსვამს საზოგადოების უფლებასაც, იყოს ინფორმირებული იმის შესახებ, რაზეც პოლიტიკოსები აპელირებენ. მსგავსი პოზიცია აქვს ვენეციის კომისიასაც. მისი განმარტებით, სანქცია მიმართული უნდა იყოს უშუალოდ დამრღვევი პირის მიმართ და გამორიცხავდეს მედიის პასუხისმგებლობას. მედიასაშუალებების დასჯა მსგავსი გამონათქვამებისთვის, ქმნის იმის რისკს, რომ მაუწყებელი თვით-ცენზორი გახდეს, რაც სრულად მიუღებელია საერთაშორისო სამართლისთვის.

ყოველი ზემოთქმულიდან გამომდინარე, წარმოდგენილი ცვლილებები, მიუხედავად გაცხადებული მიზნებისა, ზღუდავს საქართველოს კონსტიტუციით დაცულ პოლიტიკური გამოხატვის თავისუფლებას, ასევე, არაპროპორციულად ერევა მედიის საქმიანობაში, აკისრებს რა მაუწყებლებს პასუხისმგებლობას პოლიტიკური რეკლამის შინაარსთან დაკავშირებით.

განსაკუთრებით საგანგაშოა კანონმდებლობაში ახალი ცნების ე.წ. „უარყოფითი დამოკიდებულების” შემოტანა, რომელიც არ არის ნათელი და განჭვრეტადი, შეიცავს ზოგად, ორაზროვან და ბუნდოვან ფორმულირებას, რაც ქმნის ტერმინის პოლიტიკური კონტექსტის მიხედვით განმარტებისა და გამოხატვის თავისუფლებით დაცულ სფეროში არაკონსტიტუციური ჩარევის რისკს.

აღსანიშნავია, რომ საარჩევნო კოდექსის მოქმედი რედაქციით დადგენილია აგიტაციის განმარტება, რომლის მიხედვითაც, წინასაარჩევნო აგიტაცია არის ამომრჩეველთა მოწოდება საარჩევნო სუბიექტის/საარჩევნო სუბიექტობის კანდიდატის მხარდასაჭერად ან საწინააღმდეგოდ, Აგრეთვე ნებისმიერი საჯარო მოქმედება, რომელიც ხელს უწყობს ან ხელს უშლის მის არჩევას. ამდენად, საარჩევნო კოდექსით დაცულია საარჩევნო სუბიექტის საწინააღმდეგო აგიტაციაც. მიგვაჩნია, რომ მოქმედ კანონმდებლობაში არსებული მიდგომა, რომელიც იცავს საარჩევნო სუბიექტის საწინააღმდეგო აგიტაციას, განსხვავებით შემოთავაზებული სიახლისგან, შეესაბამება ადამიანის უფლებათა სტანდარტებს.

ამასთან, ცვლილებებით გათვალისწინებული ნორმების დარღვევისთვის შემოთავაზებულია მკაცრი სანქცია ფულადი ჯარიმის სახით, რამაც, შესაძლოა, დამატებითი საფრთხე შექმნას კრიტიკული პოლიტიკური აქტივობისათვის, ვინაიდან არსებობს რისკი, რომ სანქციის თავიდან არიდების მიზნით ზოგიერთმა მაუწყებელმა უარი უთხრას პოლიტიკურ პარტიას რეკლამის განთავსებაზე.

ამდენად, გამოხატვის თავისუფლება, განსაკუთრებით კი პოლიტიკურ საკითხებთან დაკავშირებით ფართოდ არის დაცული. მნიშვნელოვანია, რომ პოლიტიკურ ძალებს ჰქონდეთ შესაძლებლობა, მიმდინარე აქტუალურ საკითხებზე საკუთარი პოზიცია დააფიქსირონ, მათ შორის, გააკრიტიკონ ოპონენტი, პოლიტიკური რეკლამის მეშვეობით, რომელიც საარჩევნო კოდექსის თანახმად, შესაძლოა, საარჩევნო სუბიექტის არჩევისთვის ხელის შეწყობას ან ხელის შეშლას ისახავდეს მიზნად.

მოვუწოდებთ საქართველოს პარლამენტს, მხარი არ დაუჭიროს წარმოდგენილ კანონპროექტს და დაუყოვნებლივ გაიწვიოს სადავო დოკუმენტი.

წარმოდგენილი ცვლილებები არ ემსახურება ქვეყანაში საარჩევნო გარემოს გაუმჯობესებას და პოლარიზაციის შემცირებას, აგრეთვე, ის ზღუდავს პოლიტიკური გამოხატვისა და მედიის თავისუფლებას და საფრთხეს უქმნის ქვეყნის დემოკრატიულ განვითარებას.

საქართველოს ჟურნალისტური ეთიკის ქარტიის საბჭო 20 ოქტომბერს 2 საქმეს ონლაინ განიხილავს: 

18:00 საათზე - მამუკა ტუსკაძე ტელეკომპანია „ფორმულასა" და ტელეკომპანია „მთავარის" წინააღმდეგ

სადავო გადაცემები, ტელეკომპანიების ეთერში, 2021 წლის 09 ივნისს გავიდა და ორივე მათგანი იდენტურ საკითხს - მამუკა ტუსკაძესთან დაკავშირებულ ქონებრივ დავას ეხებოდა.

განმცხადებლის პოზიციით, სადავო მასალებში მის მიმართ გაჟღერებული ბრალდებები და საქმის სხვა დეტალები არასწორია, ჟურნალისტებმა არ გამოიყენეს მის მიერ მიწოდებული მასალა, რაც, მხარის განმარტებით, მიზნად ისახავდა მაყურებლის განზრახ შეცდომაში შეყვანას და მის დისკრედიტაციას.

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე), მესამე (დადასტურებული წყარო), მეხუთე (შესწორება), მეშვიდე (დისკრიმინაცია) და მეთერთმეტე (ფაქტის განზრახ დამახინჯება) პრინციპი.

სხდომა გაიმართება ონლაინ, პროგრამა Zoom-ის მეშვეობით. სხდომაზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება. 

საქართველოს ჟურნალისტური ეთიკის ქარტია მწუხარებას გამოთქვამს ბათუმში მომხდარი ტრაგედიის გამო და უსამძიმრებს გარდაცვლილების ოჯახის წევრებს, ახლობლებსა და მეგობრებს. 

ქარტია მედიასაშუალებებს სთხოვს გაითვალისწინონ ის პოტენციური ტრავმა, რომელიც, შესაძლოა, მძიმე კადრების ჩვენებამ მიაყენოს გარდაცვლილი პირების ახლობლებს და, ზოგადად, საზოგადოებას.

ტრაგედიების გაშუქებისას უნდა მოხდეს ბალანსის დაცვა საზოგადოებრივ ინტერესსა და ეთიკურ გაშუქებას შორის. მედია თანამგრძნობი უნდა იყოს ამგვარი მოვლენების მონაწილე პირების მიმართ და თავი უნდა აარიდოს პირის პირადი ცხოვრების ხელშეუხებლობის უფლების შელახვას.

მოვუწოდებთ ყველა მედიასაშუალებას სიფრთხილით მოეკიდოს ისეთი ვიზუალური მასალის ჩვენებას, რომელზეც ასახულია ადამიანთა ტრაგედია და ტანჯვა.

საქართველოს ჟურნალისტური ეთიკის ქარტიის საბჭო 13 ოქტომბერს 1 საქმეს ონლაინ განიხილავს: 

18:00 საათზე - ჯაბა ფუტკარაძე ტელეკომპანია „პირველის" ჟურნალისტების ნოდარ მელაძის და ნატა ქაჯაიას წინააღმდეგ 

სადავო მასალა, ტელეკომპანიის ეთერში, გადაცემაში „ნოდარ მელაძის შაბათი“, 2021 წლის 08 მაისს გავიდა. 

განმცხადებლის პოზიციით, სადავო ჟურნალისტურ პროდუქტში გავრცელებული ინფორმაცია არ შეესაბამება სიმართლეს და მის, როგორც აჭარის ავტონომიური რესპუბლიკის ფინანსთა და ეკონომიკის მინისტრის დისკრედიტაციას ემსახურება. 

განმცხადებელი თვლის, რომ დარღვეულია ქარტიის პირველი (ინფორმაციის სიზუსტე) და მეხუთე (შესწორება) პრინციპი.

სხდომა გაიმართება ონლაინ, პროგრამა Zoom-ის მეშვეობით. სხდომაზე დასწრების მსურველებმა შეგიძლიათ მოთხოვნა გამოაგზავნოთ ელექტრონულ ფოსტაზე - ethicscharter@gmail.com

საქმის განხილვა ღიაა და ნებისმიერ მსურველს შეუძლია დასწრება.

ფიზიკური და სიტყვიერი შეურაცხყოფა, პროფესიულ საქმიანობაში ხელის შეშლა, მუქარა, ტექნიკის დაზიანება და წართმევა - საქართველოს ჟურნალისტურმა ეთიკის ქარტიამ 2021 წლის არჩევნების დღეს კენჭისყრის მიმდინარეობისას ჟურნალისტების უფლებების დარღვევის შემდეგი ფაქტები გამოავლინა:

• ზუგდიდში, ერთ-ერთი საარჩევნო უბანზე უცხო პირი „ფორმულას” ჟურნალისტს, სალომე ჩადუნელს ელექტროშოკით დაემუქრა და სიტყვიერი შეურაცხყოფა მიაყენა. ფაქტთან დაკავშირებით შინაგან საქმეთა სამინისტრომ გამოძიება ჟურნალისტისთვის პროფესიულ საქმიანობაში უკანონოდ ხელისშეშლის მუხლით დაიწყო.
• ბათუმში, „TV პირველის“ ჟურნალისტის თამთა დოლენჯაშვილის ინფორმაციით, ერთ-ერთ საარჩევნო უბანთან, „ქართული ოცნების“ აქტივისტებმა მაუწყებლის აპარატურა სამარშუტო ტაქსიში ჩაკეტეს.
• გონიოში საარჩევნო უბანზე „მთავარი არხის" ჟურნალისტს შეურაცხყოფა მიაყენეს.
• ვანის საკრებულოს წევრმა „ქართული ოცნებიდან” სიტყვიერი შეურაცხყოფა მიაყენა ჟურნალისტებს.
• მედიაგამოცემა „ბათუმელების" ჟურნალისტს ხელი შეუშალეს პროფესიული საქმიანობის შესრულების დროს ბათუმის 64-ე უბნის მიმდებარე ტერიტორიაზე.
• „თქვენ ხართ გვარამიას წიწილა“ - მოქალაქე ჟურნალისტებს სიტყვიერად დაუპირისპირდა.
• ქარელში ტელეკომპანია„პირველის” ჟურნალისტს სიტყვიერი შეურაცხყოფა მიაყენეს.
• ბიძინა ივანიშვილის ხმის მიცემის დროს საარჩევნო უბანზე ოპერატორი გადაღების დროს წაიქცა.
• სიტყვიერი შეურაცხყოფა მიაყენეს „ტვ პირველის" ჟურნალისტს, გიორგი ხუხიას საარჩევნო უბანთან პროფესიული საქმიანობის შესრულების დროს.
• თბილისში, ჩუღურეთის რაიონში „ტვ პირველის” გადამღებ ჯგუფს სავარაუდოდ „ქართული ოცნების” აქტივისტი თავს დაესხა და კამერა დაუმტვრია. ტელეკომპანიის ინფორმაციით, დაზიანებულია სამაუწყებლო კომპანიის კუთვნილი ტექნიკა.
• პროფესიული საქმიანობის შესრულებისას TV 25-ის ჟურნალისტს თეო ფუტკარაძეს ფიზიკური შეურაცხყოფა მიაყენეს.
• ტელეკომპანია „პირველის” ჟურნალისტს სიტყვიერი შეურაცხყოფა მიაყენეს.
• მედიაგამოცემა „ბათუმელების" ჟურნალისტს სიტყვიერი შეურაცხყოფა მიაყენეს. მედიასაშუალების ინფორმაციით, აგრესიულად განწყობილი პირები ჟურნალისტს მუქარით პასუხობდნენ. „მოგხედავთ”, „ვიმახსოვრებთ სახელებს” - ეუბნებოდნენ ისინი ჟურნალისტს.
• გლდანში, 47-ე უბანზე ამომრჩეველმა, ონლაინგამოცემა „პუბლიკას" ჟურნალისტს მინდია გაბაძეს სიტყვიერი შეურაცხყოფა მიაყენა.
• ჩუღურეთში სიტყვიერი შეურაცხყოფა მიაყენეს „მთავარი არხის” გადამღებ ჯგუფს.
• „რადიო მარნეულის" ინფორმაციით, ერთ-ერთ საარჩევნო უბანზე მათ ჟურნალისტს გადაღებაში ხელი შეუშალეს.

საქართველოს ჟურნალისტური ეთიკის ქარტია მოუწოდებს სამართალდამცავ ორგანოებს უზრუნველყონ ჟურნალისტურ საქმიანობაში ჩარევისა და მედიასაშუალებების წარმომადგენლებზე თავდასხმის ფაქტების დაუყოვნებლივი გამოძიება.

საქართველოს ჟურნალისტური ეთიკის ქარტიის სამდივნომ დასაშვებად ცნო ნანა კაკაბაძის განცხადება მთავარი არხის და TV პირველის წინააღმდეგ.

სადავო გადაცემები, ტელეკომპანიების ეთერში, 2021 წლის 17 სექტემბერს გავიდა და გავრცელებულ “ფაილებს ეხებოდა, რომელთა წყარო სავარაუდოდ სახელმწიფო უსაფრთხოების სამსახურია.

განმცხადებლის პოზიციით, სადავო სიუჟეტებში, სადაც ამ ფაილებზეა საუბარი, ფიგურირებს მისი სახელი და გვარი და ეს ინფორმაცია ყალბია.

განმცხადებელი დავობს ქარტიის შემდეგი პრინციპების დარღვევაზე:

• პირველი - ინფორმაციის სიზუსტე;
• მესამე - დადასტურებული წყარო;
• მეხუთე - შესწორება;
• მეათე - პირადი ცხოვრების ხელშეუხებლობა.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

საქართველოს ჟურნალისტური ეთიკის ქარტიის სამდივნომ დასაშვებად ცნო ამხანაგობების “ბაგები 502” და “ბაგები 504” განცხადება ტელეკომპანია ფორმულას ჟურნალისტის, თაკო ნოზაძის წინააღმდეგ.

სადავო მასალა, ტელეკომპანიის ეთერში, 2021 წლის 09 სექტემბერს გავიდა და ის შარტავას და ყიფშიძის ქუჩებზე მშენებლობის საკითხს ეხებოდა.

განმცხადებლის პოზიციით, სიუჟეტში მშენებლობასთან დაკავშირებული ინფორმაცია სიმართლეს არ შეესაბამება. Ამასთან, ჟურნალისტი არ ეცადა მეორე მხარესთან ინფორმაციის გადამოწმებას. განმცხადებელი მიიჩნევს, რომ დარღვეულია ქარტიის პირველი - ინფორმაციის სიზუსტის პრინციპი.

ქარტიის საბჭო განცხადებას ღია სხდომაზე განიხილავს და გადაწყვეტს დაირღვა თუ არა ქარტიის პრინციპები.

2021 წლის 29 სექტემბერს On.ge-ის მთავარმა რედაქტორმა ხატია ღოღობერიძემ გაავრცელა ინფორმაცია, რომ ოპოზიციის შეხვედრაზე ონლაინ მედია არ მიიწვიეს. მისი თქმით, მიზეზად კოვიდრეგულაციები დასახელდა, თუმცა შეხვედრაზე იმყოფებოდნენ ტელევიზიის წარმომადგენლები.

ჟურნალისტურ ეთიკის ქარტიას მიიჩნია, რომ პოლიტიკოსების მხრიდან არათანაბარი მიდგომა სატელევიზიო ჟურნალისტების და ონლაინ მედიის მიმართ პრობლემურია. 

მედიის როლი დემოკრატიული საზოგადოების განვითარებაში შეუცვლელია. შესაბამისად, მნიშვნელოვანია, რომ თანაბარ პირობებში იყოს ყველა მედიასაშუალება. ონლაინ გამოცემები, ტელემედიის მსგავსად, საზოგადოების ინფორმირებისთვის მუშაობენ. ამასთან საგულისხმოა, რომ საქართველოში იმ პირთა რიცხვი ვინც ინფორმაციას ონლაინ მედიით იღებს ყოველწიურად იზრდება. 

დაუშვებელია ჟურნალისტების დაყოფა იმის მიხედვით, თუ რა პლატფორმით ავრცელებენ ისინი ინფორმაციას. ქარტიის საბჭოს მიაჩნია, რომ ონლაინ მედიის წარმომადგენლებისთვის საქმიანობის შეზღუდვა ოპოზიციის მხრიდან გაუგებარი და დაუსაბუთებელია. 

სამწუხაროდ, ეს პირველი შემთხვევა არ ყოფილა. ჟურნალისტური ეთიკის ქარტიის როგორც წევრი, ისე არაწევრი ჟურნალისტები ხშირად საუბრობენ, რომ სხვადასხვა ღონისძიებაზე ონლაინ მედიის წარმომადგენლებისთვის არათანაბარი სამუშაო პირობებია.

მოვუწოდებთ ყველა პოლიტიკურ პარტიას არ ჩააყენონ დისკრიმინაციულ მდგომარეობაში ონლაინ მედიის წარმომადგენლები და შეუქმნან სათანადო სამუშაო პირობები.