ქარტია მოუწოდებს ჟურნალისტებს კორონავირუსის შესახებ ინფორმაცია განსაკუთრებული სიფრთხილით გააშუქონ
27.02.2020

კატეგორია : განცხადებები;
გუშინ, 26 თებერვალს, საქართველოში ოფიციალურად დაფიქსირდა კორონავირუსით ადამიანის დაინფიცირების პირველი ფაქტი. აღნიშნული შემთხვევა გუშინვე მოექცა მედიის ყურადღების ცენტრში. მსგავსი შემთხვევების გაშუქებისას განსაკუთრებით მნიშვნელოვანია მედიის მიერ გავრცელებული ინფორმაცია იყოს ამომწურავი და ზუსტი. აღნიშნულიდან გამოდინარე ქარტიის საბჭო ჟურნალისტებს რამდენიმე რეკომენდაციით მიმართავს:

  1. ვირუსთან დაკავშირებით თქვენს ხელთ არსებული ინფორმაცია გადაამოწმეთ ყველა შესაძლო წყაროსთან, რადგან თქვენს მიერ გავრცელებულმა არასწორმა ინფორმაციამ, შესაძლოა, სავალალო შედეგები გამოიწვიოს.
  2. მოერიდეთ თქვენს მასალებში ისეთი ფრაზების გამოყენებას, როგორიცაა: “მკვლელი ვირუსი”; “სასიკვდილო დაავადება” და ა.შ. უარი თქვით ამბის გაშუქების სენსაციურ ტონზე, განსაკუთრებით ყურადღებით შეარჩიეთ მასალის სათაური და შეეცადეთ, რომ ის იყოს მაქსიმალურად ცხადი და ზუსტი, რათა ხელი არ შეუწყოთ მოსახლეობაში პანიკის გამოწვევას.
  3. კონკრეტული შემთხვევების გაშუქებისას არ გაამჟღავნოთ პაციენტის პირადი ინფორმაცია (ვინაობა, სამუშაო ან საცხოვრებელი ადგილი და ა.შ.), ასევე არ გააკეთოთ აქცენტი პაციენტის ეროვნებაზე, რამაც, შესაძლოა, წაახალისოს ქსეონოფობია.
  4. მოერიდეთ თქვენს მასალებში ჯანდაცვის სისტემის, სამედიცინო პერსონალის დაუსაბუთებელ კრიტიკას, ამით შეიძლება საზოგადოებაში მათ მიმართ უნდობლობა გამოიწვიოთ, რის გამოც მოქალაქეების ნაწილმა შესაძლოა თავი შეიკავოს ექიმთან დროული ვიზიტისგან.
  5. მედიის წარმომადგენლები მაქსიმალურად დაემორჩიილეთ ჯანდაცვის უწყებების მიერ სამომავლოდ დაწესებულ შესაძლო შეზღუდვებს, განსაკუთრებით კონკრეტულ ტერიტორიაზე გადაადგილების აკრძალვის ნაწილში. წესებისადმი დაუმორჩილებლობით თქვენ საფრთხეს შეუქმნით როგორც საკუთარ თავს, ასევე პაციენტებსა და მედპერსონალს.
ქარტიის საბჭო ასევე მოუწოდებს სახელმწიფო უწყებების წარმომადგენლებს, კორონავირუსთან დაკავშირებით დროული და ამომწურავი ინფორმაცია მიაწოდონ მედიას, რათა მაქსიმალურად იქნას თავიდან არიდებული დაუზუსტებელი ინფორმაციის გავრცელება.

შემოგვიერთდით Facebook-ზე

ჩამოტვირთეთ PDF ვერსია

ჟურნალისტურ საქმიანობას თან სდევს შეცდომები, არაზუსტი დეტალების გავრცელება, რაც ზოგ შემთხვევაში სისწრაფის, უყურადღებობის, პროფესიონალიზმის ნაკლებობის, მწირი გამოცდილების ანდა სხვა მიზეზით არის გამოწვეული. პასუხისმგებლიანი მედია, რომლისთვისაც აუდიტორიის სანდოობა და რეპუტაცია მნიშვნელოვანია, ცდილობს მყისიერად შეასწოროს დაშვებული შეცდომა, ამცნოს აუდიტორიას და იზრუნოს ზუსტი ინფორმაციის გავრცელებაზე.

ქარტიაში განცხადების შემოტანა შეუძლია ნებისმიერ მოქალაქეს, რომელიც მიიჩნევს, რომ ჟურნალისტმა დაარღვია ეთიკური და პროფესიული სტანდარტები. ქარტიის საბჭო იხილავს განცხადებებს როგორც ქარტიის წევრი, ისე არაწევრი ჟურნალისტების მიმართ.