კატეგორია : განცხადებები;
2023 წლის 20 მაისის დილიდან „ყვარლის ტბასთან“ აქცია მიმდინარეობს. 19 მაისს გავრცელებული ინფორმაციის თანახმად, სასტუმროში იმყოფებიან რუსეთის საგარეო საქმეთა მინისტრის, სერგეი ლავროვის შვილი და მისი ქმარი, დაგეგმილია ლავროვის შვილის მაზლის საქორწილო წვეულება. ლავროვი და მისი ოჯახის წევრები რუსეთის მიერ უკრაინაში შეჭრის შემდეგ არიან სანქცირებულები. მოქალაქეები სასტუმროს ტერიტორიაზე ლავროვის სანქცირებული შვილის ვიზიტის გასაპროტესტებლად შეიკრიბნენ. ადგილზე მუშაობს მედიაც.
ტელეკომპანია „ფორმულამ" გაავრცელა კადრები, სადაც „ყვარლის ტბის“ უსაფრთხოების თანამშრომელი „ფორმულას“ ჟურნალისტს პროფესიული საქმიანობის შესრულებაში ხელს უშლის და ფიზიკურ შეურაცხყოფას აყენებს.
გარდა ამისა, „მთავარი არხის” მიერ გავრცელებული ინფორმაციით, სასტუმროსთან სიგნალს ახშობენ და პოლიცია ჟურნალისტებს ტელეფონებს ართმევს. „ტვ პირველის" ინფორმაციით, პოლიციამ მედიასაშუალების გადამღებ ჯგუფს აპარატურა წაართვა.
ჟურნალისტური ეთიკის ქარტიის საბჭო მოუწოდებს სამართალდამცავ ორგანოებს:
- დაიცვან მედიის წარმომადგენლების უსაფრთხოება და მათი უფლებების დარღვევის შემთხვევებზე ჰქონდეთ სათანადო რეაგირება;
- დაიცვან საქართველოს კანონმდებლობა და მედიის წარმომადგენლებს არ შეუშალონ ხელი პროფესიული მოვალეობის შესრულებაში.
მივმართავთ მმართველ პარტიას, დააფიქსიროს მკაფიო პოზიცია მედიის ხელშეუხებლობის მხარდასაჭერად და გასცენ სათანადო რეკომენდაციები/ბრძანებები, რათა შეჩერდეს აქციაზე მომუშავე ჟურნალისტების სიტყვიერი და ფიზიკური შეურაცხყოფა და მიეცეთ პროფესიული მოვალეობის შესრულების საშუალება.
ეთიკის ქარტიამ არაერთხელ გამოთქვა შეშფოთება მედიის მიმართ აგრესიის ტენდენციასთან დაკავშირებით, რაც ძირითადად კრიტიკული მედიასაშუალებების მისამართით გამოიხატება. საქართველოს ჟურნალისტური ეთიკის ქარტიისთვის, როგორც ჟურნალისტური გაერთიანებისთვის, პრინციპულად მნიშვნელოვანია, რომ დაცული იყოს თითოეული ჟურნალისტის უფლება, რათა მათ შეძლონ პროფესიული საქმიანობის თავისუფლად განხორციელება და საზოგადოების ინფორმირება მიმდინარე მოვლენების შესახებ.
